خیبرپختونخوا میں حکومت کا وجود ہی بے معنی ہوچکا ہے: مولانا فضل الرحمان

جمعیت علمائے اسلام (ف) کے سربراہ مولانا فضل الرحمان نے کہا ہے کہ خیبرپختونخوا میں صرف گورننس کا بحران نہیں بلکہ حکومت کا وجود ہی بےمعنی ہو چکا ہے۔

یہ بات انہوں نے ڈیرہ اسماعیل خان میں صحافیوں سے گفتگو کرتے ہوئے کہی، جہاں انہوں نے موجودہ صوبائی حکومت پر سخت تنقید کی۔

مولانا فضل الرحمان کا کہنا تھا کہ "باجوڑ سے لے کر جنوبی وزیرستان تک لاکھوں افراد نے بدامنی، معاشی مسائل اور انتظامی ناکامیوں کی وجہ سے اپنے گھر اور کاروبار چھوڑ دیے۔ ان لوگوں نے پشاور سے کراچی تک دربدر کی ٹھوکریں کھائیں۔"

انہوں نے مزید کہا کہ "صوبے میں گورننس کا مسئلہ نہیں رہا، اب تو حکومت کا وجود ہی بےاثر اور غیر فعال ہو چکا ہے۔ شہریوں کو حالات کے رحم و کرم پر چھوڑ دیا گیا ہے۔"

مولانا کا کہنا تھا کہ ان کی جماعت عوام کو تنہا نہیں چھوڑے گی، اور ہر ممکن سطح پر ان کے حقوق اور مسائل کے لیے آواز اٹھائی جائے گی۔