اسرائیلی حملے پر عالمی سطح پر شدید مذمت، قطر کی خودمختاری کی خلاف ورزی قرار ، عالمی برادری

9 ستمبر کو قطر کے دارالحکومت دوحہ میں اسرائیلی حملے کے بعد عالمی سطح پر شدید ردعمل سامنے آیا ہے۔ حملے کا نشانہ حماس کی اعلیٰ قیادت کا دفتر تھا، جو اس وقت امریکا کی جنگ بندی تجویز پر غور کے لیے اجلاس میں مصروف تھی۔

خبر رساں اداروں رائٹرز اور اے ایف پی کے مطابق، قطر غزہ جنگ بندی کے سلسلے میں ایک کلیدی ثالث رہا ہے، اور اس حملے نے نہ صرف علاقائی بلکہ عالمی سطح پر بھی خطرے کی گھنٹی بجا دی ہے۔

سعودی عرب:

سعودی وزارت خارجہ نے اسرائیلی حملے کو "وحشیانہ جارحیت اور قطر کی خودمختاری کی کھلی خلاف ورزی" قرار دیا۔ بیان میں خبردار کیا گیا کہ اسرائیل کی مجرمانہ کارروائیاں بین الاقوامی قوانین اور عالمی اصولوں کی مسلسل خلاف ورزی ہیں، جن کے سنگین نتائج برآمد ہو سکتے ہیں۔

متحدہ عرب امارات (یو اے ای):

نائب وزیراعظم و وزیر خارجہ شیخ عبداللہ بن زاید النہیان نے اس حملے کو "کھلی اور بزدلانہ جارحیت" قرار دیا اور کہا کہ یہ اقدام خطے اور عالمی امن کے لیے خطرناک اشتعال انگیزی ہے۔

یو اے ای کے صدر کے سفارتی مشیر نے بھی بیان جاری کرتے ہوئے کہا:"ہم قطر کے ساتھ کھڑے ہیں اور اس غدارانہ اسرائیلی حملے کی پرزور مذمت کرتے ہیں۔"

پاکستان:

وزیراعظم شہباز شریف نے حملے کی شدید مذمت کرتے ہوئے کہا کہ اسرائیل کا یہ اقدام نہ صرف غیرقانونی ہے بلکہ اس نے معصوم شہریوں کی زندگیاں خطرے میں ڈال دی ہیں۔
انہوں نے امیر قطر، شاہی خاندان اور عوام کے ساتھ مکمل یکجہتی کا اظہار کرتے ہوئے کہا کہ:"یہ حملہ قطر کی علاقائی خودمختاری کی کھلی خلاف ورزی ہے اور علاقائی امن کو سبوتاژ کر سکتا ہے۔"

ترکیہ:

ترکی کی وزارت خارجہ نے کہا کہ:"جنگ بندی مذاکرات کے دوران حماس کے وفد کو نشانہ بنانا ظاہر کرتا ہے کہ اسرائیل امن نہیں، بلکہ جنگ چاہتا ہے۔"

ترک بیان میں اسرائیل کو "ریاستی سطح پر دہشت گردی کو فروغ دینے والی قوت" قرار دیا گیا۔

اردن:

وزیر خارجہ ایمن الصفدی نے اسرائیلی حملے کو "وحشیانہ جارحیت کا تسلسل" قرار دیا اور کہا کہ یہ اقدام پورے خطے کے امن و استحکام کے لیے خطرہ ہے۔

ایران:

ایرانی وزارت خارجہ کے ترجمان اسمٰعیل بقائی نے حملے کو "مجرمانہ، خطرناک اور بین الاقوامی قوانین کی کھلی خلاف ورزی" قرار دیا۔
انہوں نے عالمی برادری کی خاموشی پر تشویش کا اظہار کرتے ہوئے کہا کہ:"صہیونی جرائم پر خاموشی سب کے لیے خطرناک نتائج کا باعث بن سکتی ہے۔"

اقوامِ متحدہ:

سیکریٹری جنرل انتونیو گوتریس نے بھی حملے کی مذمت کرتے ہوئے کہا کہ:

"یہ قطر کی خودمختاری اور علاقائی سالمیت کی خلاف ورزی ہے۔"

انہوں نے تمام فریقین پر زور دیا کہ مستقل جنگ بندی کی جانب پیش رفت کریں، نہ کہ امن کے امکانات کو تباہ کریں۔