وزیراعظم شہباز شریف قطر کا دورہ مکمل کر کے وطن واپس پہنچ گئے

اسلام آباد: وزیراعظم محمد شہباز شریف قطر کا ایک روزہ سرکاری دورہ مکمل کرنے کے بعد وطن واپس پہنچ گئے۔

جمعرات کو وزیراعظم آفس کے میڈیا ونگ کی جانب سے جاری کردہ بیان کے مطابق وزیراعظم نے اپنے دورے کے دوران دوحہ میں امیر قطر شیخ تمیم بن حمد الثانی سے ملاقات کی، جس میں علاقائی سلامتی اور دوطرفہ تعلقات پر تفصیلی تبادلہ خیال کیا گیا۔

اس اہم ملاقات میں نائب وزیراعظم و وزیر خارجہ اسحاق ڈار، وزیر دفاع خواجہ محمد آصف، وزیر اطلاعات عطاء اللہ تارڑ اور معاون خصوصی برائے خارجہ امور طارق فاطمی بھی وزیراعظم کے ہمراہ تھے۔

وزیراعظم شہباز شریف نے ملاقات کے دوران دوحہ پر حالیہ اسرائیلی حملے کو بلاجواز اور بین الاقوامی قوانین کی صریح خلاف ورزی قرار دیتے ہوئے امیر قطر اور قطری عوام سے مکمل یکجہتی اور ہمدردی کا اظہار کیا۔

انہوں نے اس موقع پر قطر اور پاکستان کے درمیان دیرینہ، برادرانہ تعلقات پر روشنی ڈالتے ہوئے کہا کہ دونوں ممالک کے تعلقات مذہب، ثقافت اور مشترکہ اقدار پر مبنی ہیں، اور پاکستان نے ہر مشکل وقت میں قطر کا ساتھ دیا ہے — اور آئندہ بھی دیتا رہے گا۔

ملاقات میں خطے میں بڑھتی ہوئی اسرائیلی جارحیت، مختلف ممالک پر حملوں اور خطے میں امن و استحکام کے امکانات پر بھی تفصیلی مشاورت کی گئی۔