صدر آصف علی زرداری10روزہ سرکاری دورے پر چین روانہ

اسلام آباد:صدرِ مملکت آصف علی زرداری چین کے دورے پر روانہ ہوگئے۔

ترجمان صدرِ پاکستان کے مطابق صدر مملکت چینی حکومت کی دعوت پر یہ دورہ کر رہے ہیں۔صدر 12 سے 21 ستمبر تک چین کے مختلف علاقوں کا دورہ کریں گے۔چنگدو، شنگھائی اور شِنجیانگ میں صوبائی قیادت سے ملاقاتیں ہوں گی۔

ترجمان کے مطابق پاکستان، چین تعلقات اور اقتصادی و تجارتی تعاون پر بات چیت ہوگی۔دورے میں سی پیک اور مستقبل کے رابطہ کاری منصوبے زیر غور آئیں گے۔

جبکہ ا س دوران صدر زرداری کی چینی قیادت اور کمیونسٹ پارٹی کے رہنماؤں سے ملاقاتیں متوقع ہیں، جس میں پاکستان پیپلز پارٹی اور کمیونسٹ پارٹی چین کے درمیان تعلقات کی تجدید شامل ہوگی۔

سفارتی ذرائع کا کہنا تھا کہ ملاقاتوں میں پاک چین دوستی کا فروغ بھی شامل ہوگا۔

ترجمان کا مزید کہنا ہے کہ دورے سے پاکستان اور چین کی اسٹریٹجک تعاون پر مبنی شراکت داری مزیدمستحکم ہوگی۔صدر مملکت کا دورہ خطے میں امن، ترقی اور استحکام کے عزم کا عکاس ہے۔