چین :صدر آصف علی زرداری کا زلزلہ وارننگ سسٹم سے لیس ہائی اسپیڈ ٹرین کے ذریعے سفر

چینگدو: صدر آصف علی زرداری نے چین میں زلزلہ وارننگ سسٹم سے لیس ہائی سپیڈ ٹرین کے ذریعے سفر کیا اور نصف گھنٹے میں چینگدو سے میان یانگ کا سفر مکمل کیا۔

اس موقع پر صدر مملکت کو ٹرین کے آپریشن، سروس اور سیفٹی سسٹمز پر تفصیلی بریفنگ دی گئی،چین کے بارے میں بتایا گیا کہ اس کے پاس دنیا کا سب سے بڑا ہائی سپیڈ ریل نیٹ ورک ہے، جس میں 45 ہزار کلومیٹر طویل ٹریک شامل ہے اور سالانہ دو ارب سے زائد مسافر اس سہولت سے مستفید ہوتے ہیں۔ یہ ٹرینیں 350 کلومیٹر فی گھنٹہ کی رفتار سے چلتی ہیں اور ماحول دوست الیکٹرک ٹیکنالوجی پر مبنی ہیں۔

‎صدر آصف علی زرداری نے ٹرین اور اس میں نصب زلزلہ وارننگ سسٹم کو انجینئرنگ کا شاہکار قرار دیا اور کہا کہ چین کی جدت پسندی پاکستان سمیت دنیا کے دیگر ممالک کے لیے سبق آموز ہے۔

اس موقع پر پاکستانی سفیر خلیل ہاشمی، چینی سفیر جیانگ زائی ڈونگ اور سینیٹر سلیم مانڈوی والا بھی صدر مملکت کے ہمراہ تھے۔ میان یانگ پہنچنے پر نائب میئر وُو ہاؤ نے صدر آصف زرداری کا پرتپاک استقبال کیا۔

‎