دفاعی معاہدے سے سعودی عرب "راتوں رات ایٹمی طاقت" بن گیا ، بھارتی اداکار

ممبئی: بھارت کے معروف اداکار اور فلمی ناقد کمال راشد خان المعروف کے آر کے نے پاکستان اور سعودی عرب کے درمیان حالیہ اسٹریٹجک باہمی دفاعی معاہدے پر تبصرہ کرتے ہوئے اسے سعودی ولی عہد شہزادہ محمد بن سلمان کی دوراندیشی اور عقلمندی قرار دیا ہے۔

کمال راشد خان نے سوشل میڈیا پلیٹ فارم ایکس (سابقہ ٹوئٹر) پر اپنے ردعمل میں کہا کہ شہزادہ محمد بن سلمان نے ایک بار پھر یہ ثابت کیا ہے کہ وہ نہایت سمجھدار اور حقیقت شناس حکمران ہیں۔

انہوں نے لکھا "جب اسرائیلی وزیر اعظم نیتن یاہو نے قطر پر حملہ کیا اور سابق امریکی صدر ڈونلڈ ٹرمپ نے کوئی ردِعمل نہ دیا، تو شہزادہ محمد بن سلمان نے فوری طور پر سمجھ لیا کہ امریکا اور اسرائیل پر مکمل انحصار خطرناک ہو سکتا ہے۔"

کے آر کے کے مطابق، اسرائیل چونکہ ایک ایٹمی طاقت ہے اور کسی بھی وقت سعودی عرب پر حملہ کر سکتا ہے، اس لیے سعودی ولی عہد نے خاموشی سے پاکستان سے دفاعی معاہدہ کیا، جو خود بھی ایک جوہری طاقت ہے۔

کمال راشد خان نے دعویٰ کیا کہ "اس معاہدے کے بعد سعودی عرب عملی طور پر 'راتوں رات ایٹمی طاقت' بن گیا ہے۔ اب یہ بات یقینی ہے کہ نہ اسرائیل اور نہ ہی امریکا سعودی عرب پر حملے کی ہمت کرے گا۔"

انہوں نے مزید کہا کہ "محمد بن سلمان نے نہ امریکا، نہ چین، نہ روس، اور نہ ہی نیٹو رکن ترکی پر بھروسہ کیا، بلکہ انہوں نے پاکستان پر اعتماد کیا — ایک ایسا ملک جس کے پاس ایٹمی صلاحیت کے ساتھ ساتھ جدید جنگی ٹیکنالوجی ہے، بشمول JF-17 تھنڈر، جو کسی بھی دشمن پر کاری ضرب لگا سکتا ہے۔"