پاک-سعودیہ دفاعی معاہدہ کسی تیسرے ملک کے خلاف نہیں، دفتر خارجہ

اسلام آباد: دفتر خارجہ نے واضح کیا ہے کہ پاکستان اور سعودی عرب کے درمیان ہونے والا حالیہ اسٹریٹجک باہمی دفاعی معاہدہ کسی تیسرے ملک کے خلاف استعمال نہیں ہوگا۔

ہفتہ وار میڈیا بریفنگ کے دوران ترجمان دفتر خارجہ شفقت علی خان نے کہا کہ رواں ہفتے کے اوائل میں طے پانے والا معاہدہ خالصتاً دفاعی نوعیت کا ہے اور اس کا مقصد خطے اور عالمی سطح پر امن و سلامتی کو فروغ دینا ہے۔

انہوں نے مزید کہا "پاکستان اور سعودی عرب کے تعلقات کا ایک اہم ستون دہائیوں سے دفاعی تعاون رہا ہے، اور یہ معاہدہ اسی شراکت داری کو باضابطہ شکل دیتا ہے۔"

ترجمان نے معاہدے کو ایک تاریخی سنگ میل قرار دیا اور کہا کہ اس سے نہ صرف دونوں ممالک کی سلامتی مضبوط ہوگی بلکہ علاقائی استحکام میں بھی نمایاں بہتری آئے گی۔