صدر زرداری سے سیرین ایئر کے سی ای او کی ملاقات، پاکستان میں سرمایہ کاری بڑھانے کا اعلان

صدر مملکت آصف علی زرداری سے چین کے شہر کاشغر میں سیرین ایئر کے مالک و چیف ایگزیکٹو آفیسر ڈاکٹر یونچون یانگ نے ملاقات کی، جس میں پاکستان میں ایئرلائن کے مستقبل کے منصوبوں پر تبادلہ خیال کیا گیا۔

ایسوسی ایٹڈ پریس آف پاکستان (اے پی پی) کے مطابق، ملاقات کے دوران ڈاکٹر یانگ نے صدر زرداری کو پاکستان میں سیرین ایئر کی آئندہ سرگرمیوں اور منصوبوں سے آگاہ کیا۔ اس کے علاوہ انہوں نے پاک فضائیہ کے ساتھ جے ایف 17 تھنڈر طیاروں کی ایویونکس ٹیکنالوجی کے شعبے میں ممکنہ تعاون پر بھی روشنی ڈالی۔

ملاقات میں سینیٹر سلیم مانڈوی والا، چین میں پاکستانی سفیر اور پاکستان میں چین کے سفیر بھی شریک تھے۔

صدر مملکت نے اس موقع پر کہا کہ سیرین ایئر کو اپنے فضائی بیڑے میں مزید طیارے شامل کرنے چاہئیں تاکہ اس کے نیٹ ورک اور سفری سہولتوں میں وسعت لائی جا سکے۔

اس پر ڈاکٹر یانگ نے پاکستان میں سیرین ایئر کے آپریشنز میں مزید سرمایہ کاری کا عزم ظاہر کیا۔

یہ امر بھی قابل ذکر ہے کہ ڈاکٹر یونچون یانگ کیلیفورنیا یونیورسٹی سے پی ایچ ڈی کر چکے ہیں اور چین میں ایک معروف سیمی کنڈکٹر کمپنی کے بانی و صدر ہیں، جس کی ذیلی کمپنیاں امریکہ اور سویڈن میں بھی کام کر رہی ہیں۔

سیرین ایئر، پاکستانی ایوی ایشن سیکٹر میں پہلی چینی نجی سرمایہ کاری کا منصوبہ ہے اور یہ بیجنگ کے لیے پروازیں چلانے والی پاکستان کی پہلی نجی ایئر لائن بھی ہے۔