سعودی عرب دفاعی معاہدہ: حکومت کا پارلیمنٹ کو اعتماد میں لینے کا فیصلہ

حکومت نے سعودی عرب کے ساتھ حالیہ طے پانے والے تاریخی دفاعی معاہدے کے بارے میں پارلیمنٹ کو اعتماد میں لینے کا فیصلہ کیا ہے۔

پارلیمانی ذرائع کے مطابق، قومی اسمبلی کا اجلاس 29 ستمبر کو شام 5 بجے طلب کیا جائے گا۔

ذرائع کا کہنا ہے کہ وزارت پارلیمانی امور نے اجلاس بلانے کی سمری وزیر اعظم کو ارسال کر دی ہے۔

اس اجلاس میں وزیر دفاع خواجہ آصف معاہدے سے متعلق پالیسی بیان دیں گے۔ توقع ہے کہ قومی اسمبلی کا یہ اجلاس دو ہفتے تک جاری رہے گا، جس میں روایتی پارلیمانی ایجنڈا بھی زیر غور آئے گا۔

ذرائع کا مزید کہنا ہے کہ اجلاس میں قانون سازی کے لیے مختلف بلز اور قائمہ کمیٹیوں کی رپورٹس بھی پیش کی جائیں گی۔

یاد رہے کہ حالیہ دنوں میں سعودی ولی عہد محمد بن سلمان اور وزیر اعظم شہباز شریف کے درمیان ایک ’’اسٹریٹیجک باہمی دفاعی معاہدے (SMDA)‘‘ پر دستخط کیے گئے تھے۔

معاہدے کے تحت اگر کسی ایک ملک پر بیرونی مسلح حملہ ہوتا ہے تو اسے دونوں ممالک پر حملہ تصور کیا جائے گا۔ یہ معاہدہ دونوں ریاستوں کے قریبی تعلقات اور سکیورٹی تعاون کی تصدیق کرتا ہے۔