وزیراعظم کا سرمایہ کاری بڑھانے کے لیے فوری اقدامات کا حکم

وزیراعظم شہباز شریف نے ملک میں سرمایہ کاری اور تجارت کو بڑھانے کے لیے قابل عمل منصوبوں پر فوری کام کرنے کی ہدایت کی ہے۔

وزیراعظم نے لندن سے ویڈیو کانفرنس کے ذریعے سرمایہ کاری، اقتصادی اور تجارتی سرگرمیوں کے فروغ سے متعلق اجلاس کی صدارت کی۔

اجلاس میں شہباز شریف نے کہا کہ زراعت، آئی ٹی، معدنیات، سیاحت اور قابل تجدید توانائی کے شعبوں میں بیرون ملک سے سرمایہ کاری کے مواقع موجود ہیں، اور قابل عمل منصوبوں کو جلد از جلد عملی جامہ پہنانے کے لیے فوری اقدامات کیے جائیں۔

وزیراعظم نے وزراء کو ہدایت کی کہ مستقبل کو مدنظر رکھتے ہوئے ایک جامع روڈ میپ اور تبدیلی کا ایجنڈا ترتیب دیا جائے، جس میں نجی شعبے کی شمولیت کو یقینی بنایا جائے۔

انہوں نے کہا کہ موجودہ معاشی و اقتصادی اصلاحات کی پالیسی نے ملکی معیشت کو نئی راہ دکھائی ہے۔