اسلامی نظریاتی کونسل نے ودہولڈنگ ٹیکس کو غیر شرعی قرار دے دیا

اسلام آباد: اسلامی نظریاتی کونسل نے ودہولڈنگ ٹیکس کو غیر شرعی قرار دیتے ہوئے کہا کہ یہ زیادتی کے مترادف ہے۔

چیئرمین اسلامی نظریاتی کونسل، علامہ ڈاکٹر راغب نعیمی کی زیرصدارت اجلاس میں کونسل نے سپریم کورٹ کے 11 ستمبر کے فیصلے پر بھی تحفظات کا اظہار کیا۔ فیصلے میں نکاح کے بعد رخصتی سے قبل طلاق کی صورت میں نان نفقہ کی ادائیگی لازم قرار دی گئی تھی۔ کونسل کے مطابق یہ فیصلہ قرآن و سنت کے خلاف ہے۔

انسانی دودھ ذخیرہ کرنے والے اداروں کے قیام سے متعلق کونسل نے کہا کہ مخصوص شرائط کے تحت یہ ادارے قائم کیے جا سکتے ہیں، تاہم اس سے قبل لازمی قانون سازی کی جائے اور اس عمل میں کونسل کو شامل کیا جائے۔

کونسل نے دیت کے قانون میں مجوزہ ترامیم کی بھی مخالفت کی اور کہا کہ دیت کے قانون میں ترمیم کے لیے پیش کردہ بل سے اتفاق نہیں کرتے، کیونکہ بل میں چاندی کو حذف کر کے سونے کی غیر شرعی مقدار کو معیار بنایا گیا ہے۔

کونسل نے کہا کہ دیت کی سونا، چاندی اور اونٹ سے متعلق شرعی مقداریں قانون کا حصہ رہنی چاہئیں۔

اسلامی نظریاتی کونسل نے شوگر کے مریضوں کے لیے حلال اجزا سے تیار شدہ انسولین کے استعمال کی اجازت دی، تاہم خنزیر کے اجزا پر مشتمل انسولین سے پرہیز کرنے کی ہدایت کی اور اس حوالے سے مناسب قانون سازی پر زور دیا۔