پنجاب میں سیلاب نقصانات کے سروے کیلئے فوج تعینات کرنے کا فیصلہ

اسلام آباد: وفاقی حکومت نے پنجاب میں سیلاب سے ہونے والےنقصانات کے سروے کے لیے فوج تعینات کرنے کی منظوری دے دی۔

تفصیلات کے مطابق وفاقی حکومت نے پنجاب حکومت کی درخواست پر صوبے میں سیلاب سے ہونے والے نقصانات کے سروے کے لیے فوج تعینات کرنے کی منظوری دی۔

اس حوالےسے فوج کی تعیناتی کے باضابطہ احکامات پنجاب حکومت کو ارسال کر دیئے گئے۔

احکامات کے مطابق پنجاب کے 27 اضلاع میں سیلاب سے ہونے والے نقصات کے سروے لیے پاک فوج اپنی خدمات فراہم کرے گی۔ وفاقی حکومت نے آئین کے آرٹیکل 245 کے تحت فوج کی تعیناتی عمل میں لائی ہے،فوج کی تعیناتی سیلاب کے نقصانات کے تخمینے کے لیے مشترکہ سروے ٹیم کا حصہ ہو گی۔ 

 اس سروے میں انسانی جانوں، املاک، فصلوں، مویشیوں اور انفراسٹرکچر کو پہنچنے والے نقصانات کا تفصیلی تعین کیا جائے گا۔

واضح رہے کہ پنجاب میں سیلاب کے دوران پاک فوج اور دیگر اداروں نے بروقت ریسکیو آپریشن کرتے ہوئے ہزاروں متاثرہ شہریوں کو محفوظ مقامات پر منتقل کیا۔