انکم ٹیکس ریٹرن کی آخری تاریخ میں توسیع ہو گی یا نہیں؟ایف بی آر نے بتا دیا

اسلا م آباد: مالی سال 2024-25 کے انکم ٹیکس گوشوارے جمع کروانے کی آخری تاریخ میں توسیع کےحوالے سے فیڈرل بیورو آف ریونیو(ایف بی آر) نے وضاحت جاری کر دی۔

تفصیلات کے مطابق ایف بی آر کی جانب سے جاری کر دہ بیان میں واضح کیا گیا ہے کہ انکم ٹیکس گوشوارے جمع کرانے کی آخری تاریخ 30 ستمبر 2025 میں کسی قسم کی توسیع نہیں کی جائے گی۔

ایف بی آر نے شہریوں کو بذریعہ ایس ایم ایس آگاہ کیا ہے کہ جو افراد مقررہ تاریخ تک اپنے انکم ٹیکس ریٹرن جمع نہیں کرائیں گے، ان کے خلاف سخت کارروائی عمل میں لائی جائے گی، جس میں بھاری جرمانے، بینک اکاؤنٹس منجمد کرنے اور بیرونِ ملک سفر پر پابندی جیسے اقدامات شامل ہوں گے۔

وضاحتی بیان میں ایف بی آر نے مزید کہا کہ ٹیکس دہندگان کی اکثریت ایسے علاقوں میں مقیم ہے جو سیلاب سے متاثر نہیں ہوئے ہیں اور ان کے پاس ریٹرن فائل کرنے کی اپنی قومی ذمہ داری ادا کرنے کے لیے کافی وقت ہے۔

تاہم، جو ٹیکس دہندگان مقررہ وقت پر ریٹرن فائل کریں گے وہ ان سزاؤں سے مستثنیٰ رہیں گے۔

ایف بی آر کا کہنا تھا کہ تمام تنخواہ دار اور کاروباری افراد پر لازم ہے کہ وہ مقررہ تاریخ تک انکم ٹیکس ریٹرن جمع کرائیں۔ ادارہ ریجنل ٹیکس دفاتر (RTOs) اور ہیلپ لائن کے ذریعے ٹیکس دہندگان کو ہر ممکن تعاون فراہم کر رہا ہے۔