علی امین گنڈاپور کی اڈیالہ جیل میں بانی پی ٹی آئی سے 2 گھنٹے طویل ملاقات

راولپنڈی: وزیراعلیٰ خیبرپختونخوا علی امین گنڈاپور نے اڈیالہ جیل راولپنڈی میں  پاکستان تحریک انصاف (پی ٹی آئی) کے بانی چئیرمین عمران خان سے دو گھنٹے کی طویل ملاقات کی جس میں مختلف امور پر گفتگو کی گئی۔ 

تفصیلات کے مطابق وزیراعلیٰ خیبرپختونخوا علی امین گنڈا پور اڈیالہ جیل پہنچے، جہاں ان کی بانی پی ٹی آئی سے ملاقات کرائی گئی، ملاقات جیل کے کانفرنس روم میں کروائی گئی۔

ملاقات میں خیبرپختونخوا میں امن وامان، سیکیورٹی اور متعلقہ معاملات پرتفصیلی گفتگو ہوئی۔ وزیراعلیٰ نے تمام اہم معاملات پر بانی چیئرمین کو اعتماد میں لیا۔

مشیراطلاعات خیبرپختونخوا کا کہنا ہے کہ وزیراعلیٰ علی امین گنڈاپور نے صوبے میں امن وامان کے حوالے سے صوبائی حکومت کے اقدامات سے آگاہ کیاگیا۔

بانی پی ٹی آئی کو صوبے کی معاشی صورتحال اور بجٹ پر تفصیلی بریفنگ دی گئی، بانی پی ٹی آئی نے معیشت کے حوالے سے اقدامات پر اطمینان کا اظہار کیا، معاشی معاملات، بجٹ کے حوالے سے تفصیلی بریفنگ کیلئے بانی نے مشیرخزانہ مزمل اسلم کوبھی طلب کرلیا۔

اس کے علاوہ ملاقات میں افغانستان سے مذاکرات کے معاملے پربھی تفصیلی تبادلہ خیال ہوا، بانی پی ٹی آئی نے وزیراعلیٰ کو افغانستان کے ساتھ رابطہ کاری اور مذاکرات یقینی بنانے کی ہدایت کی۔