آزاد کشمیراحتجاج : مذاکراتی کمیٹی جلد سفارشات پیش کرے گی ، مزید اقدامات جاری

وزیراعظم شہباز شریف نے آزاد کشمیر میں عوامی ایکشن کمیٹی سے مذاکرات کے لیے مسلم لیگ (ن) اور پیپلز پارٹی کے سینئر سیاسی قائدین پر مشتمل اعلیٰ سطح مذاکراتی کمیٹی تشکیل دے دی ہے، جسے ایک خوش آئند اور درست سمت میں مثبت قدم قرار دیا جا رہا ہے۔

کمیٹی میں وزیراعظم کے سیاسی مشیر سینیٹر رانا ثنا اللہ، وفاقی وزرا سردار یوسف، احسن اقبال، ڈاکٹر طارق فضل چوہدری، سابق صدر آزاد کشمیر مسعود خان، پیپلز پارٹی کے مرکزی رہنما قمر زمان کائرہ اور دیگر سینئر رہنما شامل ہیں۔ وزیراعظم پہلے ہی وفاقی وزیر امور کشمیر انجینئر امیر مقام کو مظفرآباد بھیج کر مظاہرین سے ابتدائی مذاکرات کر چکے ہیں، جن میں بعض مطالبات تسلیم کیے گئے تھے۔

وزیراعظم نے صورتحال کا فوری نوٹس لیتے ہوئے صرف مذاکراتی کمیٹی ہی نہیں بنائی بلکہ ناخوشگوار واقعات کی شفاف تحقیقات اور متاثرہ خاندانوں کی فوری امداد کی بھی ہدایت کی ہے۔ ان اقدامات کو وزیراعظم کی کشمیری عوام سے گہری وابستگی اور جمہوریت پسندی کا مظہر قرار دیا جا رہا ہے۔

وزیراعظم نے واضح کیا ہے کہ مسائل کے حل کا واحد راستہ بات چیت اور جمہوری عمل ہے، اور مظاہرین کو بھی اسی جذبے کے ساتھ جواب دینا چاہیے۔ ان کا کہنا ہے کہ اگر جوائنٹ عوامی ایکشن کمیٹی نے مذاکرات کی پیشکش کا مثبت جواب نہ دیا تو اس کے مقاصد پر سوال اٹھ سکتے ہیں۔

وزیراعظم نے قانون نافذ کرنے والے اداروں کو صبر و تحمل سے کام لینے اور شہریوں کے آئینی حقِ احتجاج کا احترام کرنے کی بھی ہدایت کی ہے۔ ان کا کہنا ہے کہ حکومت پاکستان آزاد کشمیر کے عوام کے مسائل کو ہمیشہ اولین ترجیح دیتی رہی ہے۔

وزیراعظم شہباز شریف کی ہدایت پر کمیٹی جلد سفارشات پیش کرے گی، جن پر فوری عملدرآمد کا وعدہ کیا گیا ہے۔ وزیراعظم وطن واپسی کے بعد مذاکراتی عمل کی براہِ راست نگرانی کریں گے۔