کشمیریوں کے مطالبات کو سنجیدگی سے سنا جائے ، امن کا راستہ مذاکرات سے ہی نکلے گا ، چوہدری سرور

سابق گورنر پنجاب اور سینئر سیاسی رہنما چوہدری محمد سرور نے آزاد کشمیر میں جاری صورتحال کو نہایت تشویشناک قرار دیا ہے اور حکومت پر زور دیا ہے کہ وہ طاقت کے بجائے دانشمندی، مکالمے اور تدبر سے حالات کو سنبھالے۔

ایک بیان میں ان کا کہنا تھا کہ پاکستان کو اس وقت معاملہ فہم اور دوراندیش قیادت کی ضرورت ہے، جو کشمیری عوام کے دیرینہ مطالبات کو سنجیدگی سے سنے اور ان کا پائیدار حل نکالے۔

انہوں نے افسوس کا اظہار کیا کہ موجودہ حکومت نے طاقت کے استعمال سے صورتحال کو اس نہج پر پہنچا دیا ہے جہاں قیمتی انسانی جانوں کا ضیاع ہو رہا ہے۔ ان کا کہنا تھا کہ حالات کو مزید بگاڑنے کے بجائے فوری مذاکرات شروع کیے جائیں۔

انہوں نے حکومت وقت سے مطالبہ کیا کہ ہوش کے ناخن لے اور کشمیر کی تمام قیادت کے ساتھ بیٹھ کر تمام مطالبات کا فوری، پائیدار اور پرامن حل نکالا جائے۔

چوہدری سرور نے کہا کہ وہ گزشتہ 50 برس سے کشمیری کمیونٹی کے ساتھ کام کر رہے ہیں اور وہ بخوبی جانتے ہیں کہ کشمیری عوام کی پاکستان سے محبت، وفاداری اور استقامت کسی شک و شبہ سے بالاتر ہے۔