وزیر اعلی خیبر پختونخوا علی امین گنڈ ا پور کا عہدے سےمستعفی ہونےکا اعلان

پشاور: وزیراعلیٰ خیبر پختونخوا  علی امین گنڈا پور نے مستعفیٰ ہونےکا اعلان کردیا۔

تفصیلات کے مطابق  علی امین گنڈاپور نے ایک بیان میں کہا ہے کہ بانی پی ٹی آئی کے حکم پر  وزارت اعلیٰ کے عہدے سے مستعفی ہو رہا ہوں۔

بیان میں علی امین گنڈاپور کا کہنا ہےکہ سہیل آفریدی کو میری مکمل حمایت اور سپورٹ حاصل رہےگی،ان کا کہنا تھا کہ ہم بانی پی ٹی آئی کی رہائی اور پارٹی پالیسی کے لیے ایک ہو کر آگے بڑھیں گے۔

اس سے قبل علی امین گنڈا پور نے استعفی کے حوالے سے گردش کرنے والی خبروں پر ردعمل دیتے ہوئے کہا تھا کہ وزارت اعلی کی کرسی عمران خان اور پارٹی کی امانت ہے وہ جب کہیں گے میں واپس کر دوں گا، اور نئے منتخب ہونے والے وزیر اعلی کی بھر پور حمایت کروں گا۔

خیال رہے کہ سیکرٹری جنرل پی ٹی آئی سلمان اکرم راجا نے میڈیا سے گفتگو کرتے ہوئے ان خبروں کی تصدیق کی تھی علی امین گنڈا پور کو خیبر پختونخوا کی وزارت اعلیٰ سے ہٹانےکا فیصلہ کرلیا گیا ہے اور اس کی جگہ  سہیل آفریدی کو خیبر پختونخوا کا نیا وزیر اعلیٰ نامزد کیا گیا ہے۔

انہوں نے کہا کہ یہ عمران خان کا فیصلہ ہے جس کا پس منظر بھی بیان کیا گیا، خیبرپختونخوا میں دہشتگردی کی بدترین صورت حال ہے، آج اورکزئی میں ہمارے جوان اور افسر شہید ہوئےان کا مزید کہنا تھا کہ بانی پی ٹی آئی نے علی امین کو استعفا دینے کا حکم دیا ہے، سمجھتے ہیں کہ علی امین کے لیے بھی بہتر ہے کہ یہ عہدہ اب چھوڑ دیں، ہم نے ایک نئی پالیسی کا اعلان کرنا ہے اور نئی شروعات کرنی ہے۔

سلمان اکرم راجا نے کہا کہ کوئی دشواری نہیں ہوگی، علی امین استعفا دیں گے اور اسمبلی سہیل آفریدی کو وزیراعلیٰ منتخب کرے گی۔