پاک افغان سرحدی کشیدگی، پاکستان اسٹاک ایکسچینج میں شدید مندی ، ہزاروں پوائنٹس کی کمی

پاک افغان سرحدی کشیدگی میں اضافے کے باعث پاکستان اسٹاک ایکسچینج میں آج شدید مندی کا رجحان ہے، ٹریڈنگ کے دوران انڈیکس میں 5 ہزار پوائنٹس کی بڑی کمی ریکارڈ کی گئی ہے۔

کاروباری ہفتے کے پہلے روز کاروبار کے آغاز سے ہی سٹاک مارکیٹ میں شدید مندی دیکھنے میں آ رہی ہے، 5 ہزار سے زائد پوائنٹس کی کمی کے ساتھ پاکستان سٹاک ایکسچینج میں ہنڈرڈ انڈیکس ایک لاکھ 57 ہزار 678 پوائنٹس کی سطح پر آ گیا۔

گاڑیوں کے سمبلرز، سیمنٹ، کمرشل بینکس، فرٹیلائزر، تیل و گیس کی تلاش کرنے والی کمپنیوں، آئل مارکیٹنگ کمپنیوں، ریفائنریز اور پاور جنریشن سمیت کئی اہم شعبوں میں فروخت کے دباؤ کا رجحان دیکھا گیا، انڈیکس میں نمایاں حیثیت رکھنے والے اسٹاکس جیسے حبکو، ماری، او جی ڈی سی، پی پی ایل، پی او ایل، ایچ بی ایل اور یو بی ایل منفی زون میں ٹریڈ ہو رہے تھے۔

واضح رہے کہ گزشتہ کاروباری ہفتے کے آخری روز کاروبار کے اختتام پر ہنڈرڈ انڈیکس 1432 پوائنٹس کی کمی کیساتھ ایک لاکھ 63 ہزار 98 پوائنٹس کی سطح پر بند ہوا تھا۔

دوسری جانب انٹربینک میں امریکی کرنسی کی قدر میں 2 پیسے کمی ہوئی، ڈالر 281.17 روپے سے کم ہو کر 281.15 روپے پر ٹریڈ ہو رہا ہے۔