8جنگیں رکواچکا ہوں ،نویں جنگ رکوانا چاہتاہوں،ٹرمپ کی پیوٹن سے ٹیلیفونک گفتگو

واشنگٹن ڈی سی:امریکی صدر ڈونلڈ ٹرمپ نےکہاہے کہ 8جنگیں رکواچکا ہوں ،نویں جنگ رکوانا چاہتاہوں۔امید ہے روس یوکرین جنگ جلد روکنے میں کامیاب ہوجائیں گے۔

غیر ملکی میڈیارپورٹس کے مطابق صدر ٹرمپ نے وائٹ ہاؤس میں صحافیوں سے گفتگو کرتے ہوئے کہاکہ روس کے صدر ولادیمیر پوٹن سے ٹیلی فون پرہونے والی 2گھنٹوں کی طویل گفتگو انتہائی مفید اور نیتجہ خیز رہی۔ 

میڈیا سے گفتگو میں ٹرمپ نے کہا کہ روسی اور  یوکرینی صدور سے الگ الگ ملاقاتیں ہو سکتی ہیں،جبکہ اگلے دو ہفتوں میں ہنگری کے دارلحکومت بڈاپسٹ میںروسی صدر پیوٹن سے ملاقات متوقع ہے، جس میں یوکرین جنگ کے خاتمے پر غور کیاجائے گا۔

امریکی صدر کا کہنا تھا کہ روس یوکرین جنگ میں ہزاروں لوگ مارے جاچکے ہیں، روس پر پابندیوں کا فیصلہ مشاورت کے بعد کروں گا۔
صدر ڈونلڈ ٹرمپ نے میڈیا سےگفتگو کرتے ہوئے کہا کہ وہ آج وائٹ ہاؤس میں یوکرینی صدر ولادیمیر زیلنسکی سے ملاقات کریں گے اور انہیں پیوٹن سے ہونے والی گفتگو کے بارے میں آگاہ کریں گے۔

خیال رہے کہ یہ فون کال اُس وقت سامنے آئی جب صدر ٹرمپ جمعے کو وائٹ ہاؤس میں یوکرینی صدر وولودیمیر زیلنسکی سے ملاقات کی تیاری کر رہے ہیں۔

 زیلنسکی طویل عرصے سے امریکا سے مطالبہ کر رہے ہیں کہ وہ یوکرین کو ٹام ہاک کروز میزائلز فروخت کرے تاکہ یوکرینی افواج روس کے اندر گہرائی تک حملے کر سکے،زیلنسکی کا موقف ہے کہ ایسے حملے پیوٹن کو ٹرمپ کی براہ راست مذاکرات کی پیشکش کو سنجیدگی سے لینے پر مجبور کریں گے۔

دوسری جانب یوکرینی صدر ولادیمیر زیلنسکی صدر ٹرمپ سے ملاقات کیلئے واشنگٹن پہنچ چکے ہیں ۔ زیلنسکی امریکی صدر سے ملاقات میں روس یوکرین جنگ کے خاتمے پر تبادلہ خیال کریں گے۔