پہلا ون ڈے: پاکستان نے سنسنی خیز مقابلے کے بعد سری لنکا کو 6رنز سے شکست دے دی

راولپنڈی : پاکستان نے پہلے ون ڈے میچ میںسنسنی خیز مقابلے کے بعد سری لنکا کو 6 رنز سے شکست دے کر تین میچوں کی سیریز میں ایک صفر کی برتری حاصل کر لی ہے۔

تفصیلات کے مطابق پاکستان کی جانب سے دیے گئے 300رنز کے ہدف کے تعاقب میں سری لنکن ٹیم 293رنز ہی بنا سکی۔

سری لنکا کی جانب سے وایندو ہسررنگا59،سماراوکراما 39 اورکمیل مشرا 38 رنز بنا کر نمایاں رہے۔

پاکستان کی جانب سے حارث رؤف نے شاندار باؤلنگ کا مظاہرہ کرتے ہوئے 4 وکٹیں حاصل کیں، فہیم اشرف اور نسیم شاہ نے دو  دو جبکہ محمد نواز نے ایک وکٹ حاصل کی۔

اس سے قبل پنڈی کرکٹ اسٹیڈیم میں کھیلے جارہے سیریز کے پہلے ون ڈے میچ میں  سری لنکا نے پاکستان کیخلاف  ٹاس جیت کر فیلڈنگ کا فیصلہ کیا۔

پاکستان نے مقررہ 50 اوورز میں 5 وکٹوں کے نقصان پر 299 رنز اسکور کیے۔ سلمان آغا نے 105 رنز کی ناقابل شکست اننگز کھیلی۔

قومی ٹیم کی جانب سے اننگز کا آغاز اوپننگ بیٹر فخر زمان اور صائم ایوب نے کیا تاہم چوتھے اوور کی پہلی گیند پر صائم ایوب 6 رنز بناکر پویلین لوٹ گئے۔

جس کے بعد 18 ویں اوور میں  فخر زمان بھی 55 گیندوں پر  32 رنز بناکر آؤٹ ہوگئے،جبکہ گرین شرٹس کی تیسری وکٹ 76 رنز پر گری۔ محمد رضوان 5 رنز بناکر پویلین لوٹ ہوگئے۔

تاہم بعد ازاں حسین طلعت اور سلمان علی آغا نے شاندار شراکت داری قائم کی اور ٹیم کا اسکور 233 رنز تک پہنچایا، پھر حسین طلعت 62 رنز بناکر آؤٹ ہوگئے،جبکہ سلمان علی آغا ڈٹے رہے اور شاندار سنچری اسکور کی۔انہوں نے 87 گیندوں پر 105 رنز کی ناقابل شکست اننگز کھیلی۔

 اس کے علاوہ اختتامی اوورز میں محمد نواز بھی شاندار بیٹنگ کرتے ہوئے 23 گیندوں پر 36 رنز بناکر ناٹ آؤٹ رہے۔  

واضح رہے کہ سری لنکا کے خلاف ون ڈے سیریز آج  سے 15 نومبر تک راولپنڈی میں کھیلی جائے گی جبکہ ٹرائی نیشن سیریز 17 سے 29 نومبر تک ہوگی، ٹرائی نیشن سیریز میں پاکستان، سری لنکا اور زمبابوے کی ٹیمیں شامل ہوں گی۔