روس کا یوکرین پر 430 ڈرونز اور 18 میزائلوں سے حملہ،8 افراد جاں بحق ،متعدد عمارتیں تباہ

کیف : روس نے یوکرین کے دارالحکومت کیف پر ڈرونز او ر میزائلوں کی بارش کردی جس کے نتیجے میں 8 افرادجاں بحق جبکہ درجنوں زخمی ہوگئے۔

غیر ملکی میڈیا رپورٹس کے مطابق یوکرینی صدر ولادیمیر زیلنسکی نے بتایا کہ روس نے 430 ڈرون اور  18 میزائلوں سے دارالحکومت کیف کو نشانا بنایا۔

انہوں نے کہا کہ روس کی جانب سے ان حملوں میں شہری آبادی ، عمارتوں اور توانائی کی تنصیبات کو نشانہ بنایا گیا۔

رپورٹس کے مطابق یوکرینی حکام کی جانب سےبہت سے روسی ڈرونز اور میزائل مار گرانے کا دعویٰ کیا گیا،تاہم ساتھ ہی واضح کیا کہ ڈرونز اور میزائل حملوں سے عمارتیں تباہ ہوگئیں۔

رپورٹس کے مطابق کیف پر روسی حملوں میں آذربائیجان کے سفارتخانے کی عمارت کو بھی نقصان پہنچا جس کے بعد آذربائیجان نے روسی سفیر کو طلب کرکے احتجاج ریکارڈ کرایا۔

دوسری جانب روس نے ایک بار پھر نیٹو کو یوکرین جنگ میں شامل ہونے سے خبردا رکردیا،روس نے کہا ہےکہ یوکرین کے خلاف میزائل اور ڈرون حملوں کی روشنی میں نیٹو کو محتاط رہنا چاہیے ۔

روسی حکام کی جانب سے مزید کہا گیا کہ براہ راست مداخلت روس نیٹو تصادم کا باعث بن سکتی ہے۔