بھارتی ٹیسٹ ٹیم کے کپتان شبمن گل میچ کے دوران انجری کے باعث اسپتال منتقل

بھارت کی ٹیسٹ ٹیم کے کپتان شبمن گل کو میچ کے دوران انجری کے باعث اسپتال میں داخل کروایا گیا ہے۔

بھارت کو جنوبی افریقا کے خلاف جاری پہلے ٹیسٹ میچ میں بڑا دھچکا لگا ہے، کپتان شبمن گل گردن کی انجری کے باعث ممکنہ طور پر باقی میچ سے باہر ہو سکتے ہیں۔

بھارتی میڈیا رپورٹس کے مطابق کولکتہ کے ایڈن گارڈنز میں کھیلے جا رہے میچ کے دوسرے روز شبمن گل صرف 4 رنز بنا کر میدان سے باہر چلے گئے اور انہیں فوری طور پر اسپتال منتقل کیا گیا۔

بھارتی کپتان کو یہ انجری جنوبی افریقی اسپنر سائمن ہارمر کی گیند پر سویپ شاٹ کھیلنے کی کوشش کے دوران آئی، جس کے نتیجے میں ان کی گردن میں شدید کھچاؤ پیدا ہوا، ڈریسنگ روم میں ابتدائی طبی امداد کے دوران انہیں گردن پر کالر پہنایا گیا۔

بھارتی میڈیا کے مطابق شبمن گل کو بیٹنگ کے بعد گردن میں تکلیف اور حرکت میں رکاوٹ محسوس ہوئی، جس کے باعث صورت حال تشویشناک ہو گئی، بعد ازاں ہفتے کی شام سروائیکل کالر میں انہیں اسپتال جاتے دیکھا گیا۔

بتایا جارہا ہے کہ شبمن گل اس وقت آئی سی یو میں داخل ہیں اور وہ فی الحال ڈاکٹرز کی زیرِ نگرانی رہیں گے، کرکٹر انجری کی شدت جاننے کے لیے مزید ٹیسٹ کیے جائیں گے جس کے بعد علاج اور دستیابی سے متعلق فیصلہ کیا جائے گا۔