27ویں ترمیم کی حمایت میں ووٹ دینے پر پی ٹی آئی سینیٹر سیف اللہ ابڑو کو شوکاز نوٹس جاری

اسلام آباد: پاکستان تحریک انصاف (پی ٹی آئی) نے 27 ویں آئینی ترمیم کی حمایت میں ووٹ دینے پر سینیٹر سیف اللہ ابڑو کو شوکاز نوٹس جاری کر دیا۔

تفصیلات کے مطابق شوکازنوٹس تحریک انصاف کے سینیٹ میں پارلیمانی لیڈر سینیٹر علی ظفر کی جانب سے جاری کیا گیا، جس میں سینیٹر ابڑو سے 7 روز میں تحریری وضاحت طلب کی گئی ہے۔

شوکاز نوٹس کے متن میں کہا گیا ہے کہ سینیٹر سیف اللہ ابڑو کو پارٹی فیصلے کے تحت 27 ویں آئینی ترمیم کی مخالفت کی واضح ہدایت دی گئی تھی، تاہم انہوں نے اس فیصلے کی خلاف ورزی کی جس پر پارٹی نے وضاحت طلب کی ہے۔

نوٹس کے مطابق سینیٹر سیف اللہ ابڑو پر خلاف ورزی پر آئین کا آرٹیکل 63 اے (1) (ب) لاگو ہوتا ہے، آرٹیکل 63 اے کے تحت پارٹی ہدایت کے خلاف ووٹ دینے والا رکن منحرف تصور ہو سکتا ہے، سپریم کورٹ کی تشریح کے مطابق پارٹی کی ہدایت لازمی اور پابندِ عمل ہے۔

نوٹس میں مزید کہا گیا ہے کہ اگر 7 روز کے اندر جواب جمع نہ کرایا گیا تو پارٹی اپنے آئینی و تنظیمی اختیارات کے تحت ان کے خلاف تادیبی کارروائی کرنے کا حق محفوظ رکھتی ہے۔

پارٹی ذرائع کا کہنا ہے کہ تحریک انصاف نے 27ویں ترمیم کی منظوری کے معاملے کو سنجیدگی سے لیا ہے اور پارلیمانی نظم و ضبط کو برقرار رکھنے کے لیے ضروری اقدامات کیے جا رہے ہیں۔