وادیٔ لیپہ میں شدید برف باری، پاک فوج کے جوان عوام کی خدمت میں مصروف

ویب ڈیسک: وادیٔ لیپہ، آزاد جموں و کشمیر میں شدید سردی، منجمد درجۂ حرارت اور سخت موسمی حالات کے باوجود پاک فوج کے جوانوں کے حوصلے بلند ہیں اور وہ پوری پیشہ ورانہ مہارت اور جذبۂ خدمت کے ساتھ عوام کی خدمت میں مصروف ہیں۔

تفصیلات کے مطابق شدید برف باری اور دشوار گزار زمینی حالات کے باوجود پاک فوج کے دستے دن رات سڑکوں کی بحالی اور برف ہٹانے کے کام میں سرگرم رہے، جس کے باعث عوامی مشکلات میں نمایاں کمی آئی۔

یہ امدادی سرگرمیاں اس حقیقت کی عکاس ہیں کہ پاک فوج ہر مشکل گھڑی میں عوام کے شانہ بشانہ نہ صرف موجود ہوتی ہے بلکہ کسی بھی قربانی سے دریغ نہیں کرتی۔

وادیٔ لیپہ کے عوام نے پاک فوج کی بروقت کارروائی، انتھک محنت اور بے لوث خدمت کو دل کی گہرائیوں سے سراہا۔ مقامی باشندوں کا کہنا ہے کہ سخت ترین موسم میں بھی عوامی خدمت کو یقینی بنانا پاک فوج کی پیشہ ورانہ پہچان اور قومی فخر ہے۔

شہریوں کے مطابق شدید برف باری کے باعث سڑکیں بند ہو گئی تھیں اور لوگ گھروں میں محصور ہو گئے تھے، تاہم پاک فوج نے بروقت کارروائی کرتے ہوئے تمام سڑکیں اور لنک روڈز بحال کر دیے۔

مقامی عوام کے مطابق طبی ایمرجنسی کے دوران ایک خاتون کو بروقت ریسکیو کرنا بھی پاک فوج کی عوام دوست خدمات کا روشن ثبوت ہے۔ وادیٔ لیپہ کے عوام نے پاک فوج کی ان خدمات پر دل کی گہرائیوں سے خراجِ تحسین پیش کیا۔