پاک فوج کی افغان طالبان کے خلاف تابڑ توڑ کارروائیاں جاری، ایمونیشن ڈپو اور ڈرون اسٹوریج سائٹ تباہ

راولپنڈی:پاک فوج کی فتنہ الخوارج دہشتگرد افغان طالبان کے خلاف جاری آپریشن غضب للحق کے تحت تابڑ توڑ کارروائیاں جاری ہیںجس کے دوران خوست ایمونیشن ڈپو اور  اور ڈرون اسٹوریج سائٹ تباہ کردیا گیا ہے۔

تفصیلات کے مطابق سیکیورٹی ذارئع کا کہنا ہےکہ افغان طالبان رجیم کی جارحیت کے خلاف پاک فوج کی بھرپور اور طاقتور جوابی کارروائیاں جاری ہیں، پاک افواج نے مؤثر کارروائی کرتے ہوئے فتنہ الخوارج اور افغان طالبان کا خوست میں ایمونیشن ڈپو  تباہ کردیا ہے۔

ذرائع کے مطابق پاک افواج کی مؤثر جوابی کارروائی کے دوران فتنہ الخوارج اور افغان طالبان کے جلال آباد میں ایمونیشن ڈپو اور ڈرون اسٹوریج سائٹ کو بھی تباہ کر دیا گیا ہے۔

سیکیورٹی ذرائع نے مزید بتایا کہ پاک افواج فتنہ الخوارج اور افغان طالبان فوج کے ٹھکانوں اور فوجی تنصیبات کو موثر انداز میں نشانہ بنا رہی ہیں، فتنہ الخوارج اور افغان طالبان رجیم کو پاک افغان سرحد پربلا اشتعال جارحیت کے بعد ہر محاذ پر بھرپور پسپائی کا سامنا ہے۔

خیال رہے کہ جمعرات 26 فروری کی رات پاک افغان سرحد پر افغان طالبان کی جانب سے بلا اشتعال جارحیت کے جواب میں پاکستان کی مسلح افواج کا آپریشن غضب للحق جاری ہے،جس کے تحت افغانستان کےاندر مختلف مقامات پر جوابی کارروائیاں کیں اور کابل، قندھار اور پکتیا سمیت دیگر مقامات پر موجود عسکری تنصیبات کو نشانہ بنایا اور کئی چیک پوسٹیں تباہ کیں۔

گزشتہ روز وزیر اطلاعات و نشریات عطا تارڑ نے بتایا تھا کہ آپریشن غضب للحق کے تحت افغان طالبان رجیم کے 415 کارندے ہلاک اور 580 سے زائد زخمی ہیں، اب تک 182 پوسٹیں تباہ اور 31 پر قبضہ کیا گیا، 185 ٹینک اور مسلح گاڑیاں تباہ کر دی گئیں، 46 مقامات پر فضائی کارروائیوں میں اہداف کو نشانہ بنایا گیا۔