وزیراعظم کا سعودی عرب کے ساتھ مکمل اظہار یکجہتی اور غیر متزلزل حمایت کا اعادہ

اسلام آباد: وزیراعظم محمد شہبازشریف نے آج صبح سعودی عرب کے ولی عہد اور وزیراعظم شہزادہ محمد بن سلمان بن عبدالعزیز السعود سے ٹیلی فون پر رابطہ کیا۔

انہوں نے سعودی ولی عہد کو تمام فریقوں تک پاکستان کی تعمیری سفارتی رسائی کے بارے میں آگاہ کیا جس میں کشیدگی کم کرنے اور اختلافات کو مذاکرات اور سفارت کاری کے ذریعے حل کرنے پر زور دیاگیا۔

ولی عہد نے پاکستان کی امن کوششوں کو سراہا۔

اس موقع پر وزیراعظم شہباز شریف نے سعودی عرب پر حالیہ حملوں پر پاکستان کی طرف سے شدید مذمت کا اعادہ کیا اور ایک بار پھر اس مشکل وقت میں سعودی عرب اور اس کے عوام کیلئے پاکستان کی مکمل یکجہتی اور غیر متزلزل حمایت کا اظہار کیا۔

موجودہ بحران میں غیر معمولی تحمل کا مظاہرہ کرنے پر سعودی قیادت کو سراہتے ہوئے وزیراعظم نے ولی عہد کو یقین دلایا کہ پاکستان ہمیشہ سعودی عرب اور اس کے برادر عوام کے ساتھ کھڑا رہے گا، جس طرح انہوں نے ہمیشہ ہر مشکل وقت میں پاکستان کا ساتھ دیا ہے۔

وزیراعظم نے فوری طور پر جنگ کے خاتمے اورحالات معمول پر لانے پر زور دیا تاکہ علاقائی صورتحال کو مستحکم کیا جا سکے۔ انہوں نے کہا کہ امت کی صفوں میں اتحاد اور ہم آہنگی کی آج پہلے سے کہیں زیادہ ضرورت ہے۔

اپنی خوشگوار اور دوستانہ گفتگو کے دوران وزیراعظم نے خادم حرمین شریفین شاہ سلمان بن عبدالعزیز السعود اور سعودی عرب کے ولی عہد اور برادر عوام کو عید الفطر کی دلی مبارکباد دی۔ سعودی ولی عہد کی طرف سے بھی انتہائی احسن انداز میں جذبہ خیر سگالی کا مظاہرہ کیا گیا۔