مشرق وسطیٰ میں کشیدگی: سعودی عرب،ترکیہ اور مصری وزرائے خارجہ کل پاکستان کا دورہ کریں گے

اسلام آباد: مشرق ِ وسطیٰ میں جاری کشیدگی اور آبنائے ہرمز کی بندش کے بعد پیدا ہونے والے توانائی بحران کے خاتمے کے حوالےسے سعودی عرب، مصر اور ترکیہ کے وزرائے خارجہ کل پاکستان کا دورہ کریں گے ، جس کی تصدیق وزیر خارجہ اسحاق ڈار کی جانب سے کر دی گئی ہے۔

تفصیلات کے مطابق سعودی عرب کے وزیر خارجہ شہزادہ فیصل بن فرحان آل سعود، ترک وزیر خارجہ حقان فدان اور مصر کے وزیر خارجہ ڈاکٹر بدرعبدالعطی، کل اسلام آباد کا دو روزہ دورہ کریں گے۔

اس حوالے سے اسحاق ڈار نے اسلام آباد میں سعودی عرب، ترکیہ اور مصر کے وزرائے خارجہ کی میزبانی کی تصدیق کر دی ہے۔

ترجمان دفتر خارجہ کے مطابق دورے کا مقصد خطے میں جاری کشیدگی کو کم کرنے اور مختلف دوطرفہ و علاقائی امور پر گفت و شنید کرنا ہے، سعودی عرب، ترکی اور مصر کے وزرائے خارجہ 29 سے 30 مارچ 2026 تک اسلام آباد میں قیام کریں گے۔

ترجمان کا مزید کہنا ہے کہ دورے کے دوران، وزرائے خارجہ وزیراعظم سے بھی ملاقات کریں گے اور پاکستان کے اعلیٰ حکام کے ساتھ مختلف دوطرفہ و علاقائی امور پر بات چیت کریں گے۔

ترجمان نے بتایا کہ پاکستان سعودی عرب، ترکی اور مصر کے ساتھ اپنے تعلقات کو انتہائی اہمیت دیتا ہے اور یہ دورہ ان ممالک کے ساتھ تعاون کو مزید مضبوط کرنے کا موقع فراہم کرے گا۔

دفتر خارجہ نے مزید بتایا کہ وزرائے خارجہ کے دورے کے دوران خطے میں کشیدگی کم کرنے کی کوششوں کے علاوہ اقتصادی، سیاسی اور سیکورٹی مسائل پر بھی تفصیلی گفتگو ہوگی۔