ایک روز کے اضافے کے بعد سونا ہزاروں روپے سستا، فی تولہ کتنے کا ہو گیا؟

کراچی: ایک روز کے اضافے کے بعد عالمی اور مقامی مارکیٹوں میں سونے کی قیمت میں نمایاں کمی ریکارڈ کی گئی ہے۔

آل پاکستان جیمز اینڈ جیولرز ایسوسی ایشن کے مطابق کاروباری ہفتے کے چوتھے روزمقامی مارکیٹ میں 24 گرام فی تولہ سونے کی قیمت میں 9500 روپےکی کمی ہوئی ہے جس کے بعدایک تولہ سونے کی نئی قیمت 4 لاکھ 94 ہزار 662 روپےہوگئی۔

ایسوسی ایشن کے مطابق اسی طرح دس گرام سونا 8145 روپے کمی کے بعد 4 لاکھ 24 ہزار 92 روپے کاہوگیا۔

جبکہ چاندی 300 روپے سستی ہونے کے بعد7884 روپے فی تولہ ہوگئی ہے۔

دوسری جانب عالمی بلین مارکیٹ میں سونا 95 ڈالر کمی کے ساتھ 4723 ڈالر فی اونس ہوگیا۔

واضح رہے کہ گزشتہ روزسونے اور چاندی کی قیمت میں بڑا اضافہ ہواتھا،عالمی بازار میں سونا 157 ڈالر مہنگا ہوکر 4814 ڈالر فی اونس پر پہنچ گیاتھا جبکہ مقامی مارکیٹ میں فی تولہ سونا 15 ہزار 700 روپے مہنگاہونے کے بعد 5 لاکھ 4 ہزار 162 روپے تک جاپہنچا تھا۔