ایران امریکا مذاکرات: حکومت کا غیر ملکی مندوبین و صحافیوں کو اسلام آباد پہنچنے پر ویزا کی سہولت کا اعلان

اسلام آباد:وفاقی حکومت نے ایران امریکا مذاکرات کے لیے آنے والے غیر ملکی مندوبین و صحافیوں کو اسلام آباد پہنچنے پر ویزا دینے کا اعلان کر دیا۔

تفصیلات کے مطابق نائب وزیراعظم اسحاق ڈار نے ایکس پر لکھا ہے کہ پاکستان میں امیگریشن حکام انہیں آمد پر ویزا جاری کریں گے،اسلام آباد مذاکرات کے سلسلے میں آنے والے تمام وفود اور صحافیوں کا خیرمقدم کرتے ہیں۔

وزیر خارجہ اسحاق ڈارنے مزید بتایا کہ اس ضمن میں تمام فضائی کمپنیوں سے درخواست کی جاتی ہے کہ وہ ایسے تمام افراد کو بغیر ویزا بورڈنگ کی اجازت دیں۔

خیال رہے کہ اس سے قبل وزارتِ داخلہ نے اسلام آباد ٹاکس 2026ء کے شرکاء کے لیے خصوصی ویزا سہولت کا اعلان کیا جس کے تحت تمام متعلقہ ایئر لائنز کو شرکاء کو بغیر ویزا بورڈنگ کی اجازت دینے کی ہدایت کی گئی ہے۔

وزرات داخلہ کے مطابق اسلام آباد ٹاکس کے لیے آنے والے افراد کو آمد پر ویزا جاری کیا جائے گا، اس حوالے سے متعلقہ ایئر پورٹس پر سہولت ڈیسک قائم کردی گئی ہے جس پر شرکاء کو فوری معاونت فراہم کی جائے گی۔

اس حوالے سے وزارتِ داخلہ نے وزارتِ خارجہ، دفاع اور ایئر لائنز کو باضابطہ مراسلہ جاری کر کے حکام کو ہدایت کی ہے کہ اسلام آباد مذاکرات کے شرکاء کو ہر ممکن سہولت فراہم کی جائے۔