مذاکرات کے دور میں مخالف فریق ایرانی وفد کا اعتماد حاصل کرنے میں مکمل طور پر ناکام رہا،باقر قالیباف

تہران: یرانی مذاکراتی وفد کے سربراہ اور سپیکر پارلیمنٹ محمد باقر قالیباف نے کہا ہے کہ مذاکرات کے اس دور میں بھی مخالف فریق ایرانی وفد کا اعتماد حاصل کرنے میں مکمل طور پر ناکام رہا۔

تفصیلات کے مطابق پاکستان کی ثالثی اور میزبانی میں امریکا اور ایران کےمابین ہونے والےمذاکرات کے حوالے ایرانی اسپیکر پارلیمنٹ نے کہا ہے کہ امریکا نے ایران کی منطق اور اصولوں کو سمجھ لیا ہے، اب وقت آ گیا ہے کہ وہ فیصلہ کریں ہمارا اعتماد حاصل کر سکتے ہیں یا نہیں؟

اپنے سوشل میڈیا پلیٹ فارم ایکس پر جاری بیان میں اسپیکر باقر قالیباف نے کہا کہ ایرانی وفد میں میرے ساتھیوں نے مستقبل کی جانب دیکھتے ہوئے تجاویز پیش کیں، مخالف فریق اس مرحلے میں ایرانی وفد کا اعتماد حاصل کرنے میں ناکام رہا۔

ایک پوسٹ میں باقر قالیباف نے لکھا کہ مذاکرات سے قبل انہوں نے واضح طور پر اس بات پر زور دیا تھا کہ ایران کے پاس نیک نیتی اور سنجیدہ ارادہ موجود ہے، تاہم گزشتہ دو جنگوں کے تجربات کی بنیاد پر مخالف فریق پر کوئی اعتماد نہیں کیا جا سکتا۔

انہوں نے مزید کہا کہ ہم ہر محاذ کو، فوجی جدوجہد کے ساتھ ساتھ، اقتدار کی سفارت کاری کا ایک اور ذریعہ سمجھتے ہیں تاکہ ایرانی قوم کے حقوق کا تحفظ کیا جا سکے، اور ہم ایران کے قومی دفاع کے چالیس دنوں کی کامیابیوں کو مستحکم کرنے کی کوششوں میں ایک لمحے کے لیے بھی کمی نہیں آنے دیں گے۔

ایکس پرجاری بیان میں ایرانی اسپیکر نے مزید کہا کہ وہ اس مذاکراتی عمل کو ممکن بنانے میں پاکستان جیسے دوست اور برادر ملک کی کوششوں پر شکر گزار ہیں، اور پاکستان کے عوام کے لیے نیک تمناؤں کا اظہار بھی کیا۔

اپنے بیان میں انہوں نے مزیدکہا کہ ایران 9 کروڑ افراد پر مشتمل ایک قوم ہے، میں ایران کے تمام بہادر عوام کا شکر گزار ہوں جنہوں نے رہبرِ اعلیٰ کی ہدایات پر عمل کرتے ہوئے سڑکوں پر نکل کر اپنے بچوں کی حمایت کی اور ہمیں اپنی دعاؤں کے ساتھ روانہ کیا، اس پر میں ان کا ممنون ہوں، اور ان 21 گھنٹوں پر مشتمل سخت مذاکرات میں شریک اپنے ساتھیوں سے کہتا ہوں: شاباش، اللہ آپ کو قوت دے۔

انہوں نے ایکس پر آخر میں لکھا کہ زندہ باد اور ہمیشہ قائم رہے ہمارا پیارا ایران!

دوسری جانب وزیر خارجہ اسحاق ڈار نے امید ظاہر کی ہے کہ امریکا اور ایران جنگ بندی کے عزم پر قائم رہیں گے، دونوں ملک خطے اور دنیا میں پائیدار امن اور خوشحالی کےلیے مثبت سوچ سے آگے بڑھیں گے۔

اسحاق ڈار نے مزید کہا کہ دونوں ممالک کی جانب سے پاکستان کے مثبت کردار کو تسلیم کیے جانے پر ان کے مشکور ہیں، امید ہے کہ امریکہ اور ایران امن کے لیے بات چیت کا عمل جاری رکھیں گے، پاکستان مذاکراتی عمل میں سہولت کاری کا کردار جاری رکھے گا۔

واضح رہے کہ پاکستان کی میزبانی میں اسلام آباد میں ہوئے امریکا اور ایران کے درمیان تاریخی امن مذاکرات 21 گھنٹے کی طویل بحث کے بعد کسی حتمی نتیجے کے بغیر ختم ہو گئے۔

امریکی وفد کی قیادت کرنے والے نائب صدر جے ڈی وینس نے مذاکرات کے خاتمے پر اسے ایران کے لیے بری خبر قرار دیا اور کہا کہ ان کی ٹیم اپنی آخری اور بہترین پیشکش سامنے رکھنے کے بعد اب واپس جا رہی ہے۔