آبنائے ہرمز کے معاملے پر چین نے کھل کر ایران کی حمایت کا اعلان کر دیا

بیجنگ:آبنائے ہرمز کے معاملے پر چین نے واضح اور دو ٹوک مؤقف اپناتے ہوئے ایران کی حمایت کا اعلان کر دیا۔

غیر ملکی میڈیا رپورٹس کے مطابق چینی وزیر دفاع ایڈمرل ڈونگ جن نے کہا ہے کہ چین کے بحری جہاز آبنائے ہرمز کے آر پار آ جا رہے ہیں، ایران کیساتھ چین کے تجارتی اور توانائی کے معاہدے ہیں، جن کا ہم احترام کریں گے۔

بیان میں چینی وزیر دفاع کا مزید کہنا تھا کہ دوسروں سے بھی توقع ہے کہ وہ ہمارے معاملات میں دخل اندازی نہ کریں۔ آبنائے ہرمز کو ایران کنٹرول کرتا ہے اور ہمارے لیے کھلا ہے۔

انہوں نے کہا کہ چین دنیا میں امن و استحکام میں سنجیدہ ہے ، مشرق وسطیٰ کی صورتحال کو مسلسل مانیٹر کر ہے ہیں۔

دوسری جانب آبنائے ہرمز کے معاملے پر امریکا کی ممکنہ بحری ناکہ بندی کی دھمکی پر ترجمان چینی وزارتِ خارجہ نے ردعمل دیتے ہوئے کہا ہے کہ فریقین تحمل اور ضبط کا مظاہرہ کریں۔

اس حوالے سےترجمان کا کہنا ہے کہ اہم آبی راستے کو محفوظ، مستحکم اور بلا رکاوٹ رکھنا بین الاقوامی برادری کے مشترکہ مفاد میں ہے۔

ترجمان چینی وزارتِ خارجہ نے مزید کہا کہ چین توانائی کے تحفظ اور فراہمی کے لیے تمام فریقین کے ساتھ کام کرنے کے لیے تیار ہے۔