ایران امریکہ کے درمیان مذاکرات کا نیا دور جلد شروع ہوگا،وزیر دفاع خواجہ آصف

اسلام آباد: وزیر دفاع خواجہ آصف کا کہنا ہے کہ امریکا اور ایران کے مابین مذاکرات کے اگلے دور کا آغاز جلد ہو گا۔

تفصیلات کے مطابق وفاقی دارالحکومت اسلام آبادمیں میڈیا سے گفتگو کرتے ہوئے خواجہ آصف نے کہا کہ ایران اور امریکا کے درمیان مذاکرات کا نیا دور جلد شروع ہونے کی توقع ہے۔

گفتگو میں وزیر دفاع کا کہنا ہے کہ حالیہ رابطوں اور بات چیت کے بعد مجموعی طور پر اطمینان کا اظہار کیا جا رہا ہے اور اب تک کوئی منفی پہلو سامنے نہیں آیا۔

وزیر دفاع نے مزید کہا کہ مذاکرات کے حوالے سے صرف مثبت خبریں ہی موصول ہو رہی ہیں، جو خطے میں استحکام کے لیے خوش آئند ہیں،ان کا کہنا تھا کہ تمام فریقین بات چیت کے ذریعے مسائل کے حل کے لیے سنجیدہ دکھائی دیتے ہیں۔

میڈیا سے گفتگو میں ایک سوال کے جواب میں کہ کیا آئندہ خطے کے فیصلے پاکستان کرے گا، خواجہ آصف نے کہا کہ فیصلے اللہ تعالیٰ کی ذات کرتی ہے اور وہی بہتر جانتی ہے کہ کیا ہونا ہے۔

بھارت سے متعلق ایک سوال پر وزیر دفاع نے سخت ردعمل دیتے ہوئے کہا کہ بھارت والے تڑپ رہے ہیں، سڑ گئے ہیں اور وہیں ماتم کر رہے ہیں۔