اسحاق ڈار کا کینڈین وزیر خارجہ سے رابطہ، خطے میں امن اور استحکام کے حوالے سے تبادلہ خیال

اسلام آباد: نائب وزیراعظم و وزیر خارجہ اسحاق ڈار کا آج شام کینیڈا کی وزیر خارجہ انیتا آنند سے ٹیلیفونک رابطہ ہوا ہے،گفتگو کے دوران دونوں رہنماؤں نے خطے میں جاری صورتحال اور حالیہ پیش رفت کا جائزہ لیا۔

ترجمان دفتر خارجہ طاہر اندرابی کے مطابق ٹیلیفونک رابطے میں کینیڈین وزیر خارجہ انیتا آنند نے مختلف فریقین کے درمیان پائیدار مکالمے اور تعمیری روابط کے فروغ کے لیے پاکستان کی مسلسل کوششوں کو سراہتے ہوئے اپنی حمایت کا اظہار کیا۔

ترجمان نے مزید بتا یا رابطے میں دونوں ممالک نے خطے میں، بالخصوص لبنان سمیت، دیرپا امن اور مستحکم جنگ بندی کی امید ظاہر کی۔

ترجمان کا کہنا تھا کہ اس موقع پر فریقین نے وسیع تر علاقائی استحکام اور باہمی تعاون کے فروغ کے عزم کا اعادہ بھی کیا ہے۔