اسلام آباد میں ہونے والے مذاکرات کے دوسرے راؤنڈ میں شرکت کا ہمارا کوئی پروگرام نہیں ہے،اسماعیل بقائی

تہران: ایرانی وزارارتِ خارجہ کے ترجمان اسماعیل بقائی نے کہا ہے کہ اسلام آباد میں ہونے والے مذاکرات کے دوسرے راؤنڈ میں شرکت کا ہمارا کوئی پروگرام نہیں ہے۔

تفصیلات کے مطابق میڈیا سے گفتگو کرتے ہوئے ایران کی وزارت خارجہ کے ترجمان اسماعیل بقائی نے کہا ہے کہ تہران کی جانب سے مذاکرات کے دوسرے مرحلے میں شرکت کا فی الحال کوئی منصوبہ نہیں ہے۔ اس بارے میں پاکستان کو بتا دیا ہے۔

میڈیا سے گفتگو میں انہوں نے کہا کہ امریکہ کے حالیہ اقدامات سے واضح ہوتا ہے کہ وہ سفارتی عمل کو آگے بڑھانے میں سنجیدہ نہیں۔ ان کے مطابق امریکہ نے حال ہی میں ایران کے خلاف جارحانہ اقدامات کیے ہیں اور جنگ بندی معاہدے کی خلاف ورزی بھی کی ہے۔

ترجمان اسماعیل بقائی نے الزام عائد کیا کہ امریکہ اپنے تجربات سے کوئی سبق نہیں سیکھ رہا اور اس کا طرزِ عمل کسی مثبت نتیجے تک نہیں پہنچ سکتا۔

ترجمان کے مطابق جنگ بندی کے آغاز سے ہی امریکہ نے اس کی خلاف ورزی کی ہے، اور ایران نے اس معاملے سے پاکستان کو بھی آگاہ کیا ہے، امریکہ کی جانب سے بحری ناکہ بندی عائد کرنا بھی جنگ بندی معاہدے کی خلاف ورزی ہے، جبکہ واشنگٹن مسلسل ایران پر الزام تراشی کر رہا ہے جو کہ ایک پرانا طریقہ کار ہے۔

ان کا مزیدکہنا تھا کہ امریکہ حقائق کو نظر انداز کر کے صرف ایران کو ذمہ دار ٹھہرانے کی کوشش کرتا ہے، جو صورتحال کو مزید پیچیدہ بنا رہا ہے۔