ایران امریکہ مذکرات: عباس عراقچی نے دورہ پاکستان کا اعلان کر دیا

تہران:ایرانی وزیر خارجہ عباس عراقچی نے دورہ پاکستان کا اعلان کردیا جس میں وہ علاقائی صورتحال ، دو طرفہ امور اور امریکہ کے ساتھ مذاکرات کے حوالے سے مشاورت کریں گے۔

ایرانی سرکاری خبر رساں ادارے کے مطابق وزیر خارجہ آج شام سے اپنے دورے کا آغاز کریں گے، جس کے تحت وہ اسلام آباد، مسقط اور ماسکو جائیں گے۔

ایرانی میڈیا کا کہنا ہے کہ عباس عراقچی ان ممالک کو خطے کی موجودہ صورتحال اور ایران کے مؤقف سے آگاہ کریں گے، جس میں امریکا اور اسرائیل کی جانب سے پیدا ہونے والی کشیدگی اور اس کے علاقائی امن و استحکام پر اثرات شامل ہیں۔

جبکہ سماجی رابطے کی ویب سائٹ ایکس پر پوسٹ کرتے ہوئے انہوں نے کہا کہ وہ مسقط اورروس کادورہ بھی کرینگے،ہمارے پڑوسی ہماری اولین ترجیح ہیں،علاقائی صورتحال اوردوطرفہ امورپرمشاورت کیلئےدورہ کروں گا۔

خیال رہے کہ اس سے قبل یہ خبر سامنے آئی تھی کہ ایرانی وزیرخارجہ عباس عراقچی کی مختصرٹیم کےہمراہ آج رات اسلام آباد آمد متوقع ہے،امریکااورایران کےدرمیان اسلام آباد امن مذاکرات کادوسرادورمتوقع ہے۔

حکومتی ذرائع کا کہنا ہے کہ امریکا کی لاجسٹک اورسیکیورٹی ٹیم مذاکراتی عمل کیلئے اسلام آباد میں پہلے سے موجودہے،ایران اورامریکاکےدرمیان امن مذاکرات کادوسرا دوراسلام آباد میں ہوگا۔

دوسری جانب سیاسی وسفارتی مبصرین کا کہنا ہے کہ عراقچی کا یہ دورہ ایسے وقت میں ہو رہا ہے جب مشرقِ وسطیٰ میں کشیدگی انتہائی بلند سطح پر ہے، اور پاکستان کی ثالثی میں امریکا اور ایران کے درمیان بالواسطہ مذاکراتی عمل بھی جاری بتایا جا رہا ہے۔