عباس عراقچی کی وفد کےہمراہ وزیر اعظم سے ملاقات،مشرقِ وسطیٰ اور مذاکرات کے حوالے سے تبادلہ خیال

اسلام آباد:ایران کے وزیر خارجہ عباس عراقچی اس وقت اعلی سطحی وفد کے ہمراہ پاکستان کے دورے پرہیں جہاں ان کی وزیرِاعظم شہباز شریف سے ملاقات ہوئی ہے۔ 

وزیراعظم ہاؤس کی جانب سے جاری کردہ بیان کے مطابق ہفتے کے روز پی ایم ہاؤس میں ہونے والی اس ملاقات میں عباس عراقچی کے ساتھ ایرانی وفد بھی شریک تھا جبکہ نائب وزیرِ اعظم اسحاق ڈار اور چیف آف ڈیفنس فورسز فیلڈ مارشل عاصم منیر نے بھی اس اہم ملاقات میں شرکت کی۔

اسلام آباد: 25 اپریل 2026.

وزیرِ اعظم محمد شہباز شریف سے ایرانی وزیرِ خارجہ عباس عراقچی اور ایرانی وفد کی ملاقات.

ایرانی وزیرِ خارجہ عباس عراقچی کی وزیرِ اعظم سے ملاقات کیلئے وزیرِ اعظم ہاؤس پہنچ گئے، دونوں رہنماؤں کی ملاقات شروع ہو گئی.

ملاقات میں نائب وزیرِ اعظم و وزیرِ… pic.twitter.com/4cD2B11nWt

— Prime Minister's Office (@PakPMO) April 25, 2026

وزیر اعظم ہاؤس کی جانب سے جاری کر دہ بیان کے مطابق دونوں ممالک کے اعلیٰ سرکاری حکام کی اس ملاقات میں مشرقِ وسطیٰ کی حالیہ صورتِ حال پر غور کیا گیا۔

بعد ازاں سوشل میڈیا سائٹ ایکس پر نائب وزیراعظم و وزیر خارجہ اسحاق ڈار نے اپنے پیغام میں کہا کہ وزیراعظم شہباز شریف اور ایرانی وزیر خارجہ عباس عراقچی کی وزیراعظم ہاؤس میں ملاقات ہوئی، ملاقات تقریباً دو گھنٹے جاری رہی۔

اسحاق ڈار نے کہا کہ ملاقات میں آرمی چیف، فیلڈ مارشل سید عاصم منیر بھی شریک ہوئے، وزیر داخلہ محسن نقوی اور اعلیٰ حکام بھی اجلاس میں موجود تھے۔

اس سے قبل ایران کے وزیرِ خارجہ عباس عراقچی نے وفد کے ہمراہ فیلڈ مارشل عاصم منیر سے بھی ملاقات کی تھی،ایرانی وفد میں نائب وزیرِ خارجہ کاظم غریب آبادی، اسلام آباد میں ایران کے سفیر امیری مقدم اور ایرانی وزارت خارجہ کے ترجمان اسماعیل بقائی بھی شریک ہوئے جب کہ پاکستان کے وفاقی وزیر داخلہ محسن نقوی، مشیر برائے قومی سلامتی جنرل عاصم ملک بھی اس ملاقات میں شریک تھے۔

پاکستان آمد سے قبل ایرانی وزارت خارجہ کے ترجمان اسماعیل بقائی نے سوشل میڈیا پر جاری بیان میں کہا کہ عباس عراقچی کے دورے کا مقصد پاکستانی حکام سے ملاقاتیں کرنا ہے جس میں پاکستان کی جانب سے جاری ثالثی اور خطے میں امن کی بحالی سے متعلق امور پر تبادلہ خیال کیا جائے گا۔

ان کا کہنا تھا کہ اس دورے میں ایران اور امریکا کے درمیان کوئی ملاقات طے نہیں ہے بلکہ ایرانی وفد اپنے مشاہدات پاکستانی حکام کو فراہم کرے گا۔