بریانی کے بعد تربوز کھانے سے میاں، بیوی سمیت پورا خاندان جاں بحق

ممبئی: بھارت کی ریاست مہارشٹرا کے دارالحکومت ممبئی میں بریانی کے بعد تربوز کھانے سے میاں بیوی اور  2 بچے جاں بحق ہوگئے۔

بھارتی میڈیا این ڈی ٹی وی کی رپورٹ کے مطابق ممبئی میں ایک ہی خاندان کے چار افراد فوڈ پوائزننگ کے سبب انتقال کرگئے۔
اس حوالےسے مقامی پولیس کا کہنا ہے کہ 40 سالہ عبداللہ عبدالقادر، 35 سالہ اہلیہ نسرین، 16 سالہ بیٹی عائشہ اور 13 سال کی زینب نے ہفتے کی شب دیگر رشتے داروں کے ہمراہ بریانی کھائی،بعد ازاں رات ایک بجے انہوں نے تربوز کھایا جس کے چند گھنٹوں بعد ہی ان کی طبیعت بگڑگئی۔

ابتدائی میڈیکل رپورٹ کے مطابق صبح 5 کے قریب ان لوگوں کو شدید قے شروع ہوگئی، ابتدائی طور پر مقامی ڈاکٹر نے طبی امداد فراہم کی لیکن طبیعت مزید بگڑنے پر انہیں دوسرے اسپتال منتقل کیا گیا جہاں چاروں دوران علاج چل بسے۔

ولیس نے واقعے کا مقدمہ درج کر کے تحقیقات کا آغاز کر دیا ہے تاکہ یہ معلوم کیا جا سکے کہ آیا ہلاکتیں کھانے پینے کی چیزوں میں کسی زہریلے مادے کی موجودگی کے باعث ہوئیں یا بریانی اور تربوز کا بیک وقت استعمال جان لیوا ثابت ہوا۔

دوسری جانب اسپتال میں چاروں کا علاج کرنے والے ڈاکٹر زید قریشی نے بتایا کہ انہیں شدید قے اور ڈائریا کی شکایت تھی، انہوں نے بتایا تھا کہ ان لوگوں نے تربوز کھایا ہے،جبکہ حکام کا کہنا ہے کہ لاشوں کا پوسٹ مارٹم کرکے ہی اصل وجہ موت پتا چل سکے گا۔