جوڈیشل کمیشن اجلاس: اسلام آباد ہائیکورٹ کے تین ججوں کے تبادلوں کی منظوری 

اسلام آباد: چیف جسٹس پاکستان جسٹس یحییٰ آفریدی کی زیرصدارت جوڈیشل کمیشن آف پاکستان کے اجلاس میں ہائیکورٹ کورٹ ججوں کے تبادلوں کی منظوری دے دی گئی۔

تفصیلات کے مطابق اجلاس میں لاہور ہائیکورٹ میں ججز کے تبادلوں سے متعلق امور پر غور کیا گیا، جس کے دوران جسٹس محسن اختر کیانی کے لاہور ہائیکورٹ تبادلے کی منظوری دے دی گئی۔ یہ فیصلہ اکثریتی رائے سے کیا گیا، کمیشن کے 9 ارکان نے ان کے تبادلے کے حق میں ووٹ دیا جبکہ چیف جسٹس پاکستان سمیت 4ارکان نے مخالفت میں ووٹ دیا۔

جوڈیشل کمیشن نے جسٹس ثمن رفعت امتیاز کے سندھ ہائیکورٹ تبادلے کی بھی منظوری دے دی، جس کا فیصلہ بھی اکثریتی رائے سے کیا گیا۔ ذرائع کے مطابق اسلام آباد ہائیکورٹ کے جج جسٹس بابر ستار کا پشاور ہائیکورٹ میں تبادلہ کردیا گیا ہے، ان کے تبادلے کے خلاف 4 ووٹ سامنے آئے۔

ذرائع کے مطابق چیف جسٹس پاکستان یحییٰ آفریدی نے ججز تبادلوں کی مخالفت میں ووٹ دیا،جسٹس منیب اختر نے بھی ججز ٹرانسفر کی مخالفت کی،ذرائع کا مزید کہنا ہے کہ بیرسٹر گوہر اور سینیٹر علی ظفر نے بھی ججز ٹرانسفر کی مخالفت میں ووٹ دیا،جوڈیشل کمیشن اجلاس میں ججز ٹرانسفر کی مخالفت میں 4 ووٹ پڑے۔  

خیال رہے کہ اس سے قبل اسلام آباد ہائیکورٹ کے جج جسٹس بابر ستار نے چیف جسٹس یحییٰ آفریدی کو ایک خط تحریر کیا تھا جس میں جسٹس بابر ستار نے مؤقف اختیار کیاکہ آئین کے آرٹیکل 200 کے تحت کسی بھی جج کے تبادلے سے قبل انہیں ذاتی طور پر سنا جائے۔ انہوں نے کمیشن سے استدعا کی کہ ٹرانسفر کے معاملے پر فیصلہ کرنے سے پہلے انہیں مؤقف پیش کرنے کا موقع دیا جائے۔

 دوسری جانب کمیشن کے اراکین نے جسٹس سرفراز ڈوگر نے جسٹس ارباب طاہر اور جسٹس خادم سومرو کے تبادلوں کی سفارش واپس لے لی ہے جس کے بعد ان کے تبادلوں کا معاملہ مؤخر ہو گیا ہے۔