آبنائے ہرمز میں پابندیاں عالمی معیشت کا گلا گھونٹ رہی ہیں،انتونیو گوتریس

نیویارک:  اقوام متحدہ کے سیکرٹری جنرل انتونیو گوتریس نےبحری راستے کی بندش کے حوالے سے تشویش کا اظہار کرتے ہوئے کہاکہ آبنائے ہرمز میں پابندیاں عالمی معیشت کا گلا گھونٹ رہی ہیں۔

تفصیلات کے مطابق اقوام متحدہ کے ہیڈکوارٹر میں صحافیوں سے بات کرتے ہوئے انتونیو گرتریس نے کہا ہے کہ ایران اور امریکہ کے مابین نازک جنگ بندی تاحال برقرار رہنے کے باوجود یہ بحران تیزی سے بگڑتا جا رہا ہے۔

ان کا کہنا تھا کہ آبنائے ہرمز میں جہاز رانی کے حقوق اور آزادیوں پر پابندیاں تیل، گیس، کھاد اور دیگر ضروری اشیا کی ترسیل میں رکاوٹ ڈال رہی ہیں، توانائی، نقل و حمل، صنعت اور خوراک کی منڈیوں کو متاثر کر رہی ہیں اور عالمی معیشت کا گلا گھونٹ رہی ہیں۔

سیکرٹری جنرل نے خبردار کیا کہ اس بحران کے اثرات صرف خطے تک محدود نہیں بلکہ پوری دنیا اس کی زد میں ہے۔ ہر جنگ کی طرح اس تنازع کی قیمت بھی پوری انسانیت ادا کرے گی چاہے چند لوگ اس سے بہت بڑا منافع ہی کیوں نہ کما لیں۔

انہوں نے متحارب فریقین کو براہ راست پیغام دیتے ہوئے کہا کہ جہاز رانی کے حقوق اور آزادیوں کو فوری بحال کیا جائے، آبنائے کو کھولا جائے اور عالمی معیشت کو دوبارہ سانس لینے دیا جائے۔ تاہم، صرف راستے کھولنا کافی نہیں بلکہ تجارتی اشیا کی ترسیل کو محفوظ، قابل بھروسہ اور یقینی بنانا بھی ضروری ہے۔

 اقوام متحدہ کے ایگزیکٹو ڈائریکٹر جلد مشرق وسطی کا دورہ کریں گے۔انتونیو گوتریس نے کہا کہ ثالثی کرنے والے پاکستانی نمائندوں سے ملاقات کریں گے، عمان اور ایران بھی جائیں گے۔