معرکۂ حق کی مناسبت سے مزارِ اقبال پر پروقار تقریب، مفکرِ پاکستان کو بھرپور خراجِ عقیدت

معرکۂ حق کی مناسبت سے مزارِ اقبال پر ایک پروقار تقریب کا انعقاد کیا گیا، جہاں مفکرِ پاکستان کو شاندار خراجِ عقیدت پیش کیا گیا۔

طلباء و طالبات کی بڑی تعداد نے مزارِ اقبال پر حاضری دی اور پھولوں کی چادر چڑھا کر اپنی عقیدت و محبت کا اظہار کیا۔

نامور گلوکار راحت فتح علی خان نے "لب پہ آتی ہے دعا" سمیت کلامِ اقبال پیش کر کے محفل کو مسحور کر دیا، جبکہ گورنمنٹ کالج یونیورسٹی کے طلباء نے بھی کلامِ اقبال پیش کر کے سماں باندھ دیا۔

میمونہ ساجد نے "ہر لحظہ ہے مومن کی نئی آن نئی شان" پیش کر کے حاضرین سے خوب داد سمیٹی۔

تقریب میں مختلف جامعات کے وائس چانسلرز اور ماہرینِ تعلیم نے خصوصی شرکت کی، جن میں وائس چانسلر یو ای ٹی ڈاکٹر شاہد منیر، پرنسپل فاطمہ جناح میڈیکل کالج ڈاکٹر خالد مسعود گوندل، پرنسپل کنیرڈ کالج فار ویمن یونیورسٹی ڈاکٹر ارم، پرو ریکٹر یو ایم ٹی ڈاکٹر اعجاز اللہ چیمہ، ڈین پنجاب یونیورسٹی ڈاکٹر بسیرا امبرین، ڈین لاہور کالج فار ویمن یونیورسٹی ڈاکٹر ریحانہ، ڈین گورنمنٹ کالج یونیورسٹی ڈاکٹر شہزاد حسین، وائس چانسلر سپیریئر یونیورسٹی ڈاکٹر محمد نظام اور پروفیسر ڈاکٹر ندیم جعفر شامل تھے۔ انہوں نے تقریب سے خطاب بھی کیا۔

مقررین نے اپنے خطابات میں علامہ اقبالؒ کے فلسفۂ خودی اور دو قومی نظریے کو اجاگر کیا اور معرکۂ حق کی کامیابی کو اقبالؒ کے خوابوں کی تعبیر قرار دیا۔

شرکاء نے افواجِ پاکستان کو زبردست خراجِ تحسین پیش کیا اور تقریب میں قومی یکجہتی، نظریۂ پاکستان اور حب الوطنی کا بھرپور اظہار کیا گیا۔

مقررین نے اس بات پر زور دیا کہ فکرِ اقبال نئی نسل کے لیے مشعلِ راہ ہے۔

تقریب کے اختتام پر ملکی سلامتی، ترقی اور استحکام کے لیے خصوصی دعا بھی کی گئی۔