نئی دہلی کی رہائشی عمارت میں اے سی پھٹنے سے خوفناک آتشزدگی،9 افراد جانبحق 

نئی دہلی: بھارت کے دارالحکومت نئی دہلی کی رہائشی عمارت میں مبینہ طور پر اے سی پھٹنے سے خوفناک آتشزدگی کے نتیجے میں  9 افراد ہلاک اور متعدد زخمی ہو گئے۔

بھارتی میڈیا کے مطابق نئی دہلی کے علاقے وویک وہارمیں رہائشی عمارت کی دوسری منزل میں اچانک آگ بھڑک اٹھی، جس نے دیکھتے ہی دیکھتے تیسری اور چوتھی منزلوں کو بھی اپنی لپیٹ میں لے لیا۔

میڈیا رپورٹس کے مطابق آگ لگنے کی اطلاع ملتے ہی متعلقہ ادارے فوری ریسکیو کرنے پہنچ گئے، آگ بجھانے کے عمل میں 14 فائر ٹینڈرز نے حصہ لیا اور درجنوں لوگوں کو ریسکیو کیا گیا، 2 گھنٹوں کی محنت کے بعد آگ پر قابو پالیا گیا۔

اس حوالے سے مقامی انتظامیہ کا کہنا تھا کہ آگ لگنے کی وجہ معلوم نہ ہو سکی البتہ رہائشیوں کی جانب سے دعویٰ کیا جا رہا ہے کہ آگ مبینہ طور پر اے سی پھٹنے کی وجہ سے لگی تاہم معاملے کی تحقیقات کا آغاز کر دیا گیا ہے۔