جمائما گولڈ اسمتھ نے معروف ارب پتی فنانسر سے منگنی کر لی،جلد شادی کا امکان 

لندن:پاکستان تحریک انصاف(پی ٹی آئی ) کے بانی چئیرمین اور سابق وزیر اعظم عمران خان کی سابقہ اہلیہ جمائما گولڈ سمتھ نے معروف ارب پتی فنانسر سے منگنی کر لی۔  

برطانوی میڈیا رپورٹس کے مطابق برطانوی اسکرین رائٹر اور ڈاکیومنٹری پروڈیوسر جمائما گولڈ سمتھ نے آئرش،آسٹریلوی ارب پتی فنانسر کیمرون او’ریلی سے منگنی کر لی ، دونوں کے درمیان گزشتہ ایک سال سے تعلق قائم تھا۔

میڈیا رپورٹس کے مطابق 62 سالہ کیمرون اوریلی ایک سرمایہ کار ہیں اور متعدد بین الاقوامی کمپنیوں میں اہم عہدوں پر فائز رہ چکے ہیں، وہ سابق میڈیا ٹائیکون سر انتھونی او’ریلی کے بیٹے ہیں۔  

ذرائع کے مطابق دونوں کی ملاقات پیشہ ورانہ مصروفیات کے دوران ہوئی تھی جو بعد میں دوستی اور پھر تعلق میں تبدیل ہو گئی، جوڑا اپنی زندگی کا زیادہ وقت سوئٹزرلینڈ اور لندن میں گزارتا ہے۔ جمائما کے اہلخانہ نے بھی کیمرون اوریلی سے ملاقات کی ہے۔

رپورٹس کے مطابق منگنی کے بعد جوڑا آئندہ چند ماہ میں شادی کرنے کا ارادہ رکھتا ہے، اور امکان ظاہر کیا جا رہا ہے کہ یہ شادی 2026 کے وسط یا آخر تک ہو سکتی ہے  تاہم دونوں کی جانب سے ابھی تک باضابطہ تاریخ کا اعلان نہیں کیا گیا۔  

خیال رہے کہ  جمائما گولڈ سمتھ جو سابق پاکستانی وزیراعظم عمران خان کی سابقہ اہلیہ بھی ہیں، ماضی میں بھی اپنی نجی زندگی اور تعلقات کے باعث خبروں میں رہ چکی ہیں۔  جمیما کے کریئر میں متعدد معروف ڈاکیومنٹریز اور فلمی پروجیکٹس شامل ہیں  جبکہ حالیہ برسوں میں وہ سماجی اور انسانی حقوق کے مختلف امور پر بھی سرگرم رہی ہیں۔