مراکش میں مشترکہ مشق ’’افریقن لائن‘‘ کے دوران 2 امریکی فوجی اہلکار لاپتہ

رباط:مراکش میں جاری مشترکہ فوجی مشقوں ’افریقن لائن 2026‘ کے دوران دو امریکی فوجی اہلکار لاپتہ ہو گئے ہیں۔ امریکی فوج کے مطابق لاپتہ فوجیوں کی تلاش کے لیے مراکش اور دیگر اتحادی ممالک کی افواج کے ساتھ ریسکیو آپریشن جاری ہے۔

غیر ملکی میڈیا رپورٹس کے مطابق امریکی فوج کی افریقہ کمانڈ (افری کوم) کی جانب سے جاری بیان میں کہا گیا ہے کہ یہ واقعہ گزشتہ روز مراکش کے جنوب مغرب میں واقع ’کیپ ڈرا ٹریننگ ایریا‘ میں پیش آیا، جو بحرِ اوقیانوس کے ساحل کے قریب واقع ہے۔ دونوں فوجی اہلکار ’افریقن لائن‘ نامی سالانہ فوجی مشقوں میں مصروف تھے۔

افری کام کی جانب سے جاری بیان میں مزید کہا گیا ہے کہ امریکا، مراکش اور مشقوں میں شریک دیگر اتحادی ممالک نے مشترکہ طور پر لاپتہ فوجیوں کو تلاش کرنے کے لیے ریسکیو آپریشن شروع کر دیا ہے۔ امریکی فوج کے مطابق واقعے کی تحقیقات کی جا رہی ہیں اور اہلکاروں تلاش کا عمل جاری ہے۔

امریکی فوج کی جانب سے لاپتہ اہلکاروں کی شناخت اور واقعے کی وجوہات کے حوالے سے مزید تفصیلات سامنے نہیں آ سکی ہیں۔
واضح رہے کہ ’افریقن لائن‘ براعظم افریقہ میں امریکا کی سب سے بڑی سالانہ مشترکہ عسکری مشق ہے، جو 2004 سے باقاعدگی سے منعقد ہو رہی ہے۔

ان مشقوں میں عام طور پر امریکا اور اس کے اہم افریقی اتحادیوں کے اعلیٰ فوجی حکام شرکت کرتے ہیں۔ رواں سال یہ مشقیں اپریل میں شروع ہوئیں اور مراکش سمیت چار ممالک (تیونس، گھانا اور سینیگال) میں جاری ہیں، جو مئی میں ختم ہوجائیں گی۔