ایران جنگ کیلئے اسرائیل نےعراق میں خفیہ فوجی اڈا قائم کیا، امریکی اخبار کا دعویٰ

ویب ڈیسک:امریکی اخبار کے مطابق اسرائیل نے ایران کے خلاف فضائی کارروائیوں کے لیے عراقی صحرا میں خفیہ فوجی اڈہ قائم کیا تھا۔

تفصیلات کے مطابق وال سٹریٹ جرنل نے ذرائع کے حوالے سے بتایا ہے کہ عراقی سکیورٹی فورسز کے اہلکار معلومات کی بنیاد پر اس اڈے کے قریب پہنچے تو ان پر اسرائیل نے فضائی حملے بھی کیے تھے۔

رپورٹ کے مطابق اسرائیل اڈے کو ایران جنگ شروع ہونے سے کچھ دیر پہلے ہی قائم کیا گیا تھا اور یہاں اسرائیلی سپیشل فورسز تعینات تھیں اور یہ اسرائیلی فضائیہ کے لیے لاجسٹک مرکز کے طور کام کر رہا تھا، اڈے پر سرچ اینڈ ریسکیو ٹیمیں بھی تعینات تھیں تاکہ اسرائیلی جہاز گرنے کی صورت میں پائلٹ کو بچانے کے لیے ریسکیو آپریشن کیا جا سکے۔

اخبار کے مطابق عراق نے اس واقعہ کے خلاف مارچ کے آخر میں اقوام متحدہ میں ایک درخواست بھی جمع کرائی تھی۔

دوسری جانب برطانوی خبر ایجنسی کے مطابق وال سٹریٹ جرنل کی رپورٹ کی آزادانہ طور پر تصدیق نہیں ہو سکی ہے جبکہ اسرائیلی وزیراعظم کے دفتر نے بھی فوری طور پر اس رپورٹ پر کوئی جواب نہیں دیا ہے۔