وزیراعظم کا ملک کی خود مختاری اورعلاقائی سالمیت کی ہرقیمت پردفاع کا عزم

وزیر اعظم محمد شہباز شریف نے کسی بھی مہم جوئی کے خلاف ملک کی خودمختاری اور علاقائی سالمیت کی ہر قیمت پر دفاع کے لئے حکومت کے عزم کا اعادہ کیا ہے۔

وہ آج کمانڈ اینڈ سٹاف کالج کوئٹہ میں اساتذہ اور طلبا آفیسرز سے خطاب کر رہے تھے۔

وزیراعظم نے قومی خودمختاری کے تحفظ اور امن و استحکام یقینی بنانے میں پاکستان کی مسلح افواج کی پیشہ وارانہ مہارت، پیشہ وارانہ تیاریوں اور قربانیوں کی تعریف کی۔ انہوں نے مادر وطن کے دفاع کیلئے شہدا کو خراج عقیدت اور مسلح افواج کے غیر متزلزل عزم کو زبردست خراج تحسین پیش کیا۔

معرکہ حق کا ذکر کرتے ہوئے شہباز شریف نے فیلڈ مارشل سید عاصم منیر کی قیادت میں پاکستان کی مسلح افواج کی تاریخی فتح پر انہیں خراج تحسین پیش کیا۔

وزیراعظم نے کہا کہ آپریشن غضب للحق افغان طالبان کی دہشت گرد پراکسیوں کے خلاف معصوم شہریوں کے جان و مال کے تحفظ کے لیے پورے عزم کے ساتھ جاری ہے۔

انہوں نے جموں و کشمیر اور فلسطین کے عوام کے لیے پاکستان کی غیر متزلزل حمایت کا اعادہ بھی کیا۔

اس سے قبل کمانڈ اینڈ سٹاف کالج کوئٹہ پہنچنے پر فیلڈ مارشل سید عاصم منیر نے وزیراعظم کا استقبال کیا۔