قوم کل عیدالاضحی مذہبی جوش و جذبے کے ساتھ منائے گی

حضرت ابراہیم علیہ السلام اور حضرت اسماعیل علیہ السلام کی عظیم قربانی کی یاد میں قوم کل عیدالاضحی مذہبی جوش و جذبے کے ساتھ منائے گی۔

دن کا آغاز مساجد میں امتِ مسلمہ کی بھلائی اور ملک کے امن، ترقی اور خوشحالی کے لیے خصوصی دعاؤں سے ہوگا۔

ملک بھر کے تمام شہروں، قصبوں اور دیہاتوں میں مساجد، عیدگاہوں اور کھلے مقامات پر عید کی نماز کے اجتماعات منعقد ہوں گے۔

علمائے کرام اپنے خطباتِ عید میں حضرت ابراہیم علیہ السلام اور حضرت اسماعیل علیہ السلام  کی عظیم قربانی کی اہمیت اور فلسفے پر روشنی ڈالیں گے۔

لوگ سنتِ ابراہیمی کی پیروی میں جانوروں کی قربانی کریں گے۔

وفاقی اور صوبائی حکومتوں نے کسی بھی ناخوشگوار واقعے سے نمٹنے کے لیے سیکیورٹی کے جامع انتظامات کیے ہیں۔

مختلف شہروں اور قصبوں کی مقامی انتظامیہ نے عید کے دنوں میں آلائشوں اور فضلے کو ٹھکانے لگانے کے لیے بھی خصوصی انتظامات کیے ہیں۔

ریڈیو پاکستان عیدالاضحی کے حوالے سے خصوصی پروگرام نشر کرے گا۔