اقوام عالم کی مشترکہ کاوشوں اور موثر باہمی تعاون سے ہی ماحول دوست مستقبل کو یقینی بنایا جا سکتا ہے،شہباز شریف

اسلام آباد:وزیر اعظم محمد شہباز شریف نے عالمی برادری کے ساتھ ہم آواز ہو کر کرہ ارض کے تحفظ کے لیے اپنے بھرپور عزم کا اعادہ کرتے ہوئے کہا ہے کہ پاکستان ان ممالک میں سر فہرست ہے جو عالمی سطح پر ماحولیاتی مضر اثرات میں نہایت کم حصہ ہونے کے باوجود موسمیاتی تبدیلی سے سب سے زیادہ متاثر ہیں، پاکستان ماحولیاتی تنزلی کی انسانی اور معاشی قیمت ادا کر رہا ہے،انفرادی، حکومتی اور عالمی سطح پر اجتماعی عزم اور تعاون ان چیلنجز سے نبرد آزما ہونے کا واحد حل ہے۔

تفصیلات کے مطابق عالمی یوم ماحولیات پر جاری پیغام میں وزیراعظم نے کہا کہ اقوام عالم کی مشترکہ کاوشوں اور موثر باہمی تعاون سے ہی ماحول دوست مستقبل کو یقینی بنایا جا سکتا ہے،اس سال کا موضوع ’’موسمیاتی اقدامات‘‘ اس حقیقت کی موثر یاددہانی ہے کہ ماحولیاتی تحفظ کے لئے بین الاقوامی عملی تعاون ناگزیر ہے، موسمیاتی تبدیلی کی صورت میں کرہ ارض پر بڑھتے ہوئے ماحولیاتی خطرات مسائل کی واضح نشاندہی کر رہے ہیں، یہ عالمی سطح کے اقدامات پر مبنی جامع حکمت عملی کے متقاضی ہیں۔

بیان میں انہوں نے کہا کہ تباہ کن سیلاب، طویل خشک سالی، شدید گرمی کی لہریں، گلیشیئرز کا پگھلائو، پانی کی قلت اور فضائی آلودگی اس امر کا ثبوت ہیں کہ موسمیاتی تبدیلی محض خدشات نہیں بلکہ ایک تلخ حقیقت ہے جو دنیا بھر میں لاکھوں افراد کی زندگیوں کو متاثر کر رہی ہے۔
انہوں نے کہا کہ پاکستان ان ممالک میں سر فہرست ہے جو عالمی سطح پر ماحولیاتی مضر اثرات میں نہایت کم حصہ ہونے کے باوجود موسمیاتی تبدیلی سے سب سے زیادہ متاثر ہیں، پاکستان ماحولیاتی تنزلی کی انسانی اور معاشی قیمت ادا کر رہا ہے۔

ان کا مزید کہنا تھا کہ انفرادی، حکومتی اور عالمی سطح پر اجتماعی عزم اور تعاون ان چیلنجز سے نبرد آزما ہونے کا واحد حل ہے،حکومت قابل تجدید توانائی کے فروغ، جنگلات کی بحالی، حیاتیاتی تنوع کے تحفظ، آبی وسائل کے موثر انتظام، آلودگی میں کمی، موسمیاتی موافق زراعت اور سبز صنعتوں کے فروغ کے لیے پرعزم ہے۔

حکومت قدرتی ماحولیاتی نظام کی بحالی کو فروغ دینے والی پالیسز پر کام کر رہی ہے۔ انہوں نے کہا کہ ہماری نوجوان نسل کی صلاحیتیں، توانائی اور اختراعی سوچ ایک سرسبز، محفوظ اور موسمیاتی طور پر مضبوط پاکستان کی تشکیل میں کلیدی کردار ادا کرے گی۔

بیان میں شہباز شریف نے مزید کہا کہ نوجوان نسل کی علم، ٹیکنالوجی اور مواقع کے ذریعے موثر ماحولیاتی آگاہی ہی پائیدار و تعمیری معاشرہ کی ضمانت ہے۔ انہوں نے کہا کہ آج میں ہر شہری، ادارے، کاروباری شعبہ، کسان اور زراعت سے وابستہ افراد سے اپیل کرتا ہوں کہ وہ موسمیاتی استحکام اور ماحولیاتی تحفظ کی ذمہ داری کو قومی فریضہ سمجھیں۔

انہوں نے کہا کہ عالمی یوم ماحولیات پر تجدید عہد کریں کہ اجتماعی سطح پر ماحول دوست طرز زندگی اپنائیں گے۔ بالخصوص پانی اور توانائی کے وسائل کا تخفظ، شجرکاری،جنگلی حیات کا تحفظ ہماری قومی ترجیحات ہیں۔وزیر اعظم نے کہا کہ آئیے مشترکہ عزم کے ساتھ متحد ہو کر سر سبز، صحت افزاء، صاف ستھرا، ماحول دوست اور موسمیاتی لحاظ سے مستحکم پاکستان کی تعمیر کریں تاکہ ہماری آنے والی نسلیں ایک بہتر اور پائیدار مستقبل سے مستفید ہو سکیں۔