اپاچی ہیلی کاپٹر مار گرائے جانے کے بعد امریکہ کے ایران کے مختلف شہروں پرفضائی حملے

واشنگٹن: امریکی فوج نے ایران کے مختلف علاقوں میں حملے کیے ہیں، جبکہ امریکی سینٹرل کمانڈ (سینٹکام) نے ان کارروائیوں کی تصدیق کرتے ہوئے کہا ہے کہ حملے صدر ڈونلڈ ٹرمپ کی ہدایت پر کیے گئے۔

سینٹکام کے بیان کے مطابق یہ کارروائی ایک امریکی اپاچی ہیلی کاپٹر کو مار گرائے جانے کے ردعمل میں کی گئی۔ امریکی فوج نے ایران کے خلاف جوابی حملوں کا سلسلہ مکمل کرنے کا بھی اعلان کر دیا ہے۔

دوسری جانب ایرانی خبر ایجنسی کے مطابق صوبہ ہرمزگان کے مشرقی علاقوں میں دھماکوں کی آوازیں سنی گئی ہیں، جبکہ جنوبی ایران کے ساحلی شہر سیرک میں میزائل حملے کی اطلاعات موصول ہوئی ہیں۔ 

ایرانی سرکاری میڈیا کے مطابق جزیرہ قشم کو بھی نشانہ بنایا گیا ہے، جبکہ بندر عباس میں بھی دھماکوں کی اطلاعات سامنے آئی ہیں۔ایران نے امریکی ہیلی کاپٹر پر حملے میں ملوث ہونے کی سختی سے تردید کی ہے۔ ایرانی نائب وزیر خارجہ نے میڈیا سے گفتگو کرتے ہوئے کہا کہ تہران کا امریکی ہیلی کاپٹر پر حملے سے کوئی تعلق نہیں ہے۔

انہوں نے کہا کہ ایران کی جانب سے امریکی ہیلی کاپٹر کو جان بوجھ کر نشانہ نہیں بنایا گیا، تاہم آبنائے ہرمز میں کشیدہ صورتحال کے باعث ایسے واقعات غیر ارادی طور پر پیش آ سکتے ہیں۔ایرانی نائب وزیر خارجہ نے زور دیا کہ موجودہ علاقائی کشیدگی کے تناظر میں حقائق کو مدنظر رکھتے ہوئے صورتحال کا جائزہ لیا جانا چاہیے۔