ایرانی صدر مسعود پزشکیان کو وزیراعظم ہاؤس آمد پر گارڈ آف آنر پیش

اسلام آباد:ایران کے صدر ڈاکٹر مسعود پزشکیان کووزیر اعظم ہاؤس آمد پر گارڈ آف آنر پیش کیا گیا۔

تفصیلات کے مطابق ایران کے صدر ڈاکٹر مسعود پزشکیان کے اعزاز میں باضابطہ استقبالیہ تقریب وزیراعظم ہاؤس اسلام آباد میں منعقد ہوئی ۔

اس سے قبل جب ایران کے صدرڈاکٹر مسعود پزشکیان وزیراعظم ہاؤس پہنچے تووزیراعظم محمد شہبازشریف نے مرکزی دروازے پر انہیں گرم جوشی سےخوش آمدید کہا۔ دونوں رہنماؤں کے درمیان خیر سگالی کے کلمات کا تبادلہ ہوا۔استقبالیہ تقریب کے آغاز پر دونوں ملکوں کے قومی ترانے بجائے گئے۔

مسلح افواج کے چاق و چوبند دستے نےصدر ڈاکٹر مسعود پزشکیان کو سلامی دی اور گارڈآف آنر پیش کیا۔معززمہمان نے گارڈ آف آنر کا معائنہ کیا۔

اس موقع پروزیراعظم محمد شہباز شریف نے معززمہمان سے اپنے کابینہ ارکان اور وفد کا تعارف کرایا۔صدرڈاکٹرمسعود پزشکیان نے بھی

وزیراعظم پاکستان سے اپنے وفد کا تعارف کرایا۔وزیرخارجہ عباس عراقچی اور اعلی سطح وفد ایرانی صدر کے وفد میں شامل ہیں۔

صدر مسعود پزشکیان نے وزیراعظم محمد شہباز شریف کے ہمراہ وزیراعظم ہاؤس کے سبزہ زار میں پودا بھی لگایا۔

پاکستان اور ایران کی قیادت کے درمیان حالیہ مہینوں میں اعلیٰ سطح رابطوں میں اضافہ ہوا۔ صدر مسعود پزشکیان کے دورے سے دو طرفہ تعاون کی نئی راہیں کھلیں گی۔