ڈی آئی جی آپریشنزلاہور نے غیر قانونی افغان باشندوں کے خلاف بھرپور کریک ڈاؤن کا حکم دے دیا

لاہور: ڈی آئی جی آپریشنز فیصل کامران نے غیر قانونی طور پر مقیم افغان باشندوں کے خلاف بھرپور کریک ڈاؤن کا حکم دیتے ہوئے تجارتی مراکز، مارکیٹوں اور مختلف کاروباری اداروں میں ملازمت سے وابستہ غیر قانونی افغان باشندوں کے خلاف کارروائیاں تیز کرنے کی ہدایت کی ہے۔ انہوں نے واضح کیا کہ ایسے افراد کو رہائش یا دیگر سہولیات فراہم کرنے والوں کے خلاف بھی قانونی کارروائی عمل میں لائی جائے۔

یہ ہدایات انہوں نے صدر ڈویژن پولیس کے انسدادِ جرائم اجلاس کی صدارت کرتے ہوئے جاری کیں، جس میں ایس پی سکیورٹی، ایس پی صدر، سرکل افسران، ایس ایچ اوز اور چوکی انچارجز نے شرکت کی۔

ڈی آئی جی آپریشنز نے ایس ایچ اوز کو موٹر سائیکل سنیچنگ کی وارداتوں پر مؤثر قابو پانے، آئس، چرس اور دیگر منشیات کی ترسیل روکنے کے لیے بھرپور کارروائیاں کرنے اور اشتہاری، عادی مجرمان سمیت عدالتی مفروروں کو گرفتار کر کے قانون کے کٹہرے میں لانے کی ہدایت کی۔

انہوں نے خواتین اور بچوں سے متعلق مقدمات میں زیرو ٹالرنس پالیسی اپنانے، فوری قانونی کارروائی یقینی بنانے اور کسی بھی مقدمے میں تخفیفِ جرم سے گریز کرتے ہوئے درست دفعات کے تحت مقدمات درج کرنے کا حکم دیا۔

فیصل کامران نے کہا کہ ایس ایچ اوز ہر سنگین واردات کے کرائم سین پر لازمی پہنچیں اور متاثرہ شہریوں کو بروقت انصاف کی فراہمی یقینی بنائیں۔ انہوں نے چہلم اور عرس کے اجتماعات سے قبل فلیش اور دیگر حساس پوائنٹس پر سکیورٹی و انتظامی مسائل فوری حل کرنے کی بھی ہدایت کی۔

ڈی آئی جی آپریشنز نے خبردار کیا کہ کرپشن، فرائض میں غفلت یا لاپرواہی کسی صورت برداشت نہیں کی جائے گی اور ایسے اہلکاروں کے خلاف قانونی و محکمانہ کارروائی عمل میں لائی جائے گی۔